თეა წულუკიანი – ​გადაწყვეტილებაში მითითებულია, როგორ უნდა განაწილდეს ეს თანხა

იუსტიციის მინისტრის, თეა წულუკიანის თქმით, სტრასბურგის სასამართლოს დღევანდელი გადაწყვეტილების თანახმად, საქართველოს სახელმწიფოს სამი თვის ვადაში, რუსეთის ფედერაციის მიერ 10 მილიონი ევროს მორალური კომპენსაცია ჩაერიცხება, რომელიც დაზარალებულებს უნდა გადაეცეს. როგორც მან აღნიშნა, 18 თვის ვადაში უნდა შემუშავდეს მექანიზმი, რომლის მიხედვითაც გადანაწილდება თანხა.
„ამ საქმეს ორი ეტაპი ჰქონდა. პირველი ეტაპი 2014 წელს საქმის არსებითი განხილვის შედეგად, საქართველოს სახელმწიფოს გამარჯვებით დასრულდა, ხოლო მეორე ეტაპი, რომელიც ეხებოდა კომპენსაციის საკითხს, დღეს ამ გადაწყვეტილებით დასრულდა. მოცემული გადაწყვეტილების თანახმად, საქართველოს სახელმწიფოს ჩაერიცხება რუსეთის ფედერაციის მიერ დღეიდან სამი თვის პერიოდის ვადაში 10 მილიონი ევროს ოდენობის მორალური კომპენსაცია, რომელიც უნდა გადაეცეს იმ დაზარალებულებს, ვინც 2006 წელს რუსეთის ფედერაციის მიერ კოლექტიური გამოძევების მსხვერპლი იყო.
საზოგადოებისთვის ცნობილია, რომ რუსეთთან, 2014 წლიდან დღემდე, მრავალი პროცედურული, კომპლექსური პრობლემა გვქონდა იმასთან დაკავშირებით, თუ რა ოდენობის დაზარალებული ჰყავდა 2006 წელს რუსეთის ფედერაციის მიერ განხორციელებულ ქმედებებს და იყო თუ არა კომპენსაციის განსაზღვრის წესი ის წესი, რომელსაც სტრასბურგის სასამართლო ადგენდა საქმეზე „კვიპროსი თურქეთის წინააღმდეგ.
​გადაწყვეტილებაში მითითებულია, როგორ უნდა განაწილდეს ეს თანხა, მაგრამ შესამუშავებელი დარჩება მექანიზმი და ამისთვის 18 თვე გვაქვს მოცემული. ნათქვამია, რომ ისინი, ვინც მხოლოდ გამოძევების მსხვერპლი იყვნენ, 2 ათას ევროს მიიღებენ მორალური კომპენსაციის სახით, მაგრამ მათ, ვინც ასევე არაადამიანური მოპყრობის ან უკანონო დაკავებისა და პატიმრობის მსხვერპლი გახდნენ, დამატებით უნდა მიიღონ 10 ათასიდან 15 ათასი ევრო. ეს არის ჩარჩოები, რაც დაადგინა დღეს დიდმა პალატამ“, – განმარტა თეა წულუკიანმა.
შეგახსენებთ, რომ ადამიანის უფლებათა ევროპული სასამართლოს გადაწყვეტილებით, რუსეთმა საქართველოს 1 500 მოქალაქეს არამატერიალური ზიანის მიყენებისთვის, კომპენსაციის სახით, 10 მილიონი ევრო უნდა გადაუხადოს.