საქართველოს საკონსტიტუციო სასამართლო 28 დეკემბერს, 11:00 საათზე არსებითად განიხილავს კოალიცია „დამოუკიდებელი და გამჭვირვალე მართლმსაჯულებისთვის“ მიერ მომზადებულ საკონსტიტუციო სარჩელს საქართველოს იუსტიციის უმაღლესი საბჭოს წინააღმდეგ.
საკონსტიტუციო სარჩელით საქართველოს საკონსტიტუციო სასამართლოს „საქართველოს დემოკრატიულმა ინიციატივამ“ 2018 წლის ივლისში მიმართა და საქართველოს იუსტიციის უმაღლესი საბჭოს გადაწყვეტილების „მოსამართლეობის კანდიდატების შერჩევის წესის დამტკიცების შესახებ“ იმ ნორმის არაკონსტიტუციურად ცნობა მოითხოვა, რომელიც მოსამართლეობის კანდიდატებთან გასაუბრების დახურულ სხდომაზე ჩატარებას ადგენს.
„სხდომათა დახურვის ტენდენციამ განსაკუთრებით ბოლო პერიოდში მოიმატა და მიუხედავად საზოგადოების მაღალი ინტერესისა, 2018 წლის იანვრის შემდეგ დახურულ სხდომაზე გასაუბრება გაიმართა 50- მდე კანდიდატთან, რომელთაგანაც 35 მოსამართლედ უვადოდ დაინიშნა“, – ნათქვამია „საქართველოს დემოკრატიულმა ინიციატივის“ მიერ გავრცელებულ პრესრელიზში.
საქმეს არსებითად განიხილავს საქართველოს საკონსტიტუციო სასამართლოს პირველი კოლეგია.