გენერალური პროკურატურის ინფორმაციით, გამოკითხვა საქალაქო სასამართლოში პროკურატურის შუამდგომლობით შედგება. როგორც არჩილ ტყეშელაშვილმა ჟურნალისტებთან საუბრისას განაცხადა, პროკურატურა გამოკითხვის ფარგლებში „თიბისი ბანკის“ დამფუძნებელს, მოსთხოვს პასუხს იმის შესახებ, რაც მან თქვა საპარლამენტო კომიტეტზე, მათ შორის წერილთან დაკავშირებით.
მისივე თქმით, გავრცელებული ინფორმაცია იმის შესახებ, თითქოს მამუკა ხაზარაძემ გამოძიებას მიაწოდა ინფორმაცია, რომ მან მიიღო მუქარის წერილი შს მინისტრისგან, არ შეესაბამება სინამდვილეს.
„ხაზარაძეს მსგავსი შინაარსის განცხადება პროკურატურაში არ გაუკეთებია. მან მხოლოდ იმის შესახებ ისაუბრა, რომ მიიღო წერილი ეროვნული ბანკისგან, სადაც მითითებული იყო მისი და ბადრი ჯაფარიძის შესაძლო თანამდებობების დატოვების შესახებ. დღევანდელი დაკითხვის ფარგლებში მამუკა ხაზარაძეს მოვთხოვთ პასუხებს იმის შესახებ, რაც მან თქვა საპარლამენტო კომიტეტის სხდომის დროს, რა წერილი მიიღო შს მინისტრისგან და მოვთხოვთ ამ ინფორმაციის დამადასტურებელ დოკუმენტს“, – განაცხადა საქმის პროკურორმა.
თბილისის საქალაქო სასამართლოში, TBC ბანკის დამფუძნებლის, მამუკა ხაზარაძის გამოკითხვა იწყება. ხაზარაძე სასამართლოში რამდენიმე წუთის წინ მივიდა. მან მედიასთან მცირე კომენტარი გააკეთა და თქვა, რომ მუქარის შემცველი წერილი, რომელიც შს მინისტრმა გიორგი გახარიამ მას საპრეზიდენტო არჩევნების წინ გაუგზავნა, სასამართლოში მიიტანა.
„წერილი თან მაქვს“, – უპასუხა მან ჟურნალისტებს.
მისივე თქმით, ჟურნალისტებთან კომენტარს სასამართლოში გამოკითხვის შემდეგ გააკეთებს. მამუკა ხაზარაძე სასამართლოში ადვოკატ ზვიად კორძაძესთან ერთად მივიდა.