„თი-ბი-სი ბანკის“ დამფუძნებელმა მამუკა ხაზარაძემ მუქარის შემცველი წერილიდან მეორე პუნქტის მოთხოვნა შეასრულა, – ამის შესახებ მამუკა ხაზარაძის ადვოკატმა ზვიად კორძაძემ განაცხადა.
მისივე განმარტებით, მამუკა ხაზარაძემ წერილი სავარაუდოდ, 2018 წლის პირველ ნოემბერს, არჩევნებამდე 27 დღით ადრე მიიღო.
ამასთან, ადვოკატი არ ასახელებს შუამავლის ვინაობას, რომელმაც სკანდალური წერილი ხაზარაძეს გადასცა.
მისივე განმარტებით, მისმა კლიენტმა წერილის შესახებ დეტალური ინფორმაცია მიაწოდა სასამართლოში გამოკითხვის დროს.
„დაკითხვის დროს თქვა მამუკა ხაზარაძემ, რომ ეს ერთ-ერთი პუნქტი შეასრულა, არ ნანობს და არ ეამაყება ნამდვილად ამ პუნქტის შესრულება, ესეც აღნიშნა დაკითხვის დროს, მაგრამ ეს იყო ნაბიჯი, რომელიც მან გადადგა ანაკლიის და ბანკის მდგომარეობიდან გამომდინარე, რომ ეს თემა არ შეხებოდა მათ. ესეც განუმარტა პროკურატურას, მოტივი, ანუ სახეზე გვაქვს, რომ წერილი მიიღო, მეორე დღეს რაღაცა გააკეთა, იმ საღამოს ვიღაცეებმა ეს გაიგეს, წერილის შედგენაში მოეხმარნენ, მეორე დღეს გამოქვეყნებული, იანვარში ბიზნესმენებს უთხრა, რომ ასეთი წერილი მივიღე, ელჩებს ელაპარაკა ამ წერილზე და შემდეგ საჯაროდ ისაუბრა ამაზე. პროკურატურა რატომ არ დაინტერესდა ამ წინა ისტორიით, მართლა რას ელოდნენ, რომ წერილი მივიდოდა დამოწმებული, რომ ნამდვილად და მეტი გამოძიება არაფრის არ დასჭირდებოდა? მაშინ გამოძიება რა საჭიროა, თუკი ასეთი წერილი არსებობდა?“ – ზვიად კორძაძემ.
შეგახსენებთ, რომ დღეს გენერალურმა პროკურატურამ წერილის ასლი გამოაქვეყნა.
“თიბისი ბანკის” დამფუძნებლის მტკიცებით, აღნიშნული წერილი შს მინისტრის გიორგი გახარისგან მიიღო. წერილის მიხედვით, მამუკა ხაზარაძეს სამი პირობის შესრულებას სთხოვენ.
პირველი – ტელეკომპანია პირველმა შეიცვალოს სარედაქციო პოლიტიკა და ტელეიმედის მსგავსად ჩაერთოს ომში ოპოზიცის წინააღდეგ.
მეორე – ხაზარაძემ გააკეთოს განცხადება, რომ მისთვის მიუღებელია “ნაციონალური მოძრაობის” რევანში და ბიზნესს კარგად ახსოვს როგორ ექცეოდნენ წინა ხელისუფლების პირობებში.
მესამე – ტელეკომპანია “არტარეა,” რომელიც ხაზარაძის საკუთრებაა, ჩაერთოს პოლიტიკურ კამპანიაში.
აღსანიშნავია, რომ მამუკა ხაზარაძემ საპრეზიდენტო არჩევნებამდე განცხადება გაავრცელა.
განცხადების თანახმად, „თიბისი ბანკის“ დამფუძნებელი მიიჩნევს, რომ ქვეყანაში რევანშიზმის საფრთხის წინაშე დგას, რომელსაც შეუძლია საქართველოს განვითარება რამდენიმე წლით შეაფერხოს და გამოიწვიოს ქაოსი.
ადვოკატი: მამუკა ხაზარაძემ მუქარის შემცველი წერილიდან მეორე პუნქტის მოთხოვნა შეასრულა
2019/03/07 12:29:11
კომენტარები
ნანახია: 659 ჯერ