სამეფო კარის თამაშები გრძელდება – ბაგრატიონების დინასტიის ორი შტო ერთმანეთს ღიად დაუპირისპირდა. დედოფალი მეფეს ტიტულებით ვაჭრობაში ადანაშაულებს, მეფე კი დედოფლს დნმ-ის ტესტის ჩატარებას სთხოვს, რადგან ეჭვობს, რომ დედოფალი სამეფო წარმომავლობის არ არის.
რამდენიმე წუთის წინ დავით ბაგრატიონ მუხრანელის ადვოკატმა მედიისთვის კომენტარი გააკეთა.
ნუგზარ ბაგრატიონს ყოფილი სიძე მოუწოდებს, შეწყვიტოს სამართლებრივი დავა, რადგან ეს სამეფო სახლს აზიანებს.
დავით ბაგრატიონ მუხრანელი ბრალდებას ბრალდებითვე პასუხობს და ამბობს, რომ მისმა ყოფილმა ცოლმა და მისმა ნათესავებმა სხვისი გენიალოგია მიითვისეს.
„დავის მიზანი არის, რომ გრუზინსკების სახლმა რაიმე ფორმით, სახელმწიფოსგან რაიმე ფორმით მიიღოს აღიარება,რომ ისინი არიან საქართველოს სამეფოს სახლი და საქართველოს მეფეთა შთამომავლები. ისინი ამას ვერ ადასტურებენ დოკუმენტურად, რამეთუ მათ არ აქვთ გენეალოგია წესრიგში. ბატონი ნუგზარი ჯიუტად თავს არიდებს DNM ანალიზის აღებას, რაც კვლავ ამძაფრებს ეჭვს,რომ ჩვენ რეალურად გვაქვს საქმე გამყალბებლებთან,პირდაპირ შეგვიძლია ვთქვათ, ადამიანებთან რომლებიც ითვისებენ სხვის გენიალოგიას, სხვის გვარსა და ღირსებას,“-აცხადებს დავით ბაგრატიონ-მუხრანსკის ადვოკატი ლევან ჩხეიძე.
უცნობია, დაესწრება თუ არა ნუგზარ ბაგრატიონი ყოფილი სიძის წინააღმდეგ დაწყებულ სასამართლო დავას. DNM-ის ტესტთან დაკავშირებით კი ამბობს, რომ ჩაიტარებს თუ არა კვლევას ეს მისი საქმეა.
„მე იქნებ მაქვს კიდეც ჩატარებული ანალიზი იქნებ არ მაქვს ეს არავის ეხება ჩემს გარდა”-განაცხადა „კურიერთან“ სატელეფონო საუბრისას ნუგზარ ბაგრატიონ-გრუზინსკიმ.
სასამართლო პროცესი ხვალ გაიმართება.