გიორგი პაპუაშვილი საკონსტიტუციო სასამართლოს მოსამართლეების განცხადებას პასუხობს

საკონსტიტუციო სასამართლოს მოსამართლეების ნაწილის მიერ დღეს გავრცელებულ განცხადებას საკონსტიტუციო სასამართლოს თავმჯდომარე გიორგი პაპუაშვილი პასუხობს.
პაპუაშვილი მიიჩნევს, რომ მოსამართლეების ნაწილის მიერ გავრცელებული განცხადება გაუგებრობამ გამოიწვია.
“ძალიან სამწუხაროა, რომ საკონსტიტუციო სასამართლოს 20 წლიანი მოღვაწეობის პერიოდში პირველად მოხდა, რომ შიდა პროცედურის სამართალწარმოების საკითხები, რაც ჩვეულებრივი დისკუსიისა და მსჯელობის საგანია ხოლმე სასამართლოში, გამოვიდა რაღაც სეპარატისტული განცხადების სახით. მე ამას უფრო გაუგებრობას დავარქმევდი“, – განაცხადა პაპუაშვილმა.
მისივე თქმით, „რუსთავი 2“-ის საქმე პლენუმმა განიხილა და ახლა მოსამართლეები გადაწყვეტილების მიღებაზე მუშაობენ. რაც შეეხება მეორე საქმეს, ე.წ. „კაბელების საქმეს“, ყველა მოსამართლის გადაწყვეტილებით სხდომები მომავალ კვირას გაგრძელდება.
კითხვაზე, ხომ არ შეუშლის მოსამართლეების მიერ დღეს გავრცელებული განცხადებების მსგავსი განცხადებები სასამართლოს მუშაობას ხელს, პაპუაშვილმა შემდეგნაირად უპასუხა:
“ვფიქრობ, რომ თითოეული მოსამართლის მაღალი პასუხისმგებლობაა, რომ მოღვაწეობდეს ადამიანის უფლებებისათვის, ამიტომ ამასთან დაკავშირებით არ შემიძლია რაიმე სპეკულაციები გავწიო, უბრალოდ ვფიქრობ, რომ გაუგებრობა იყო და ჩვეულებრივ გავაგრძელებთ მუშაობას, ამიტომ დაველოდოთ მოვლენების განვითარებას“, – აღნიშნა გიორგი პაპუაშვილმა.