8 თვის შვილის მკვლელობისთვის ბრალდებულის მეუღლის ოჯახის წევრები ამბობენ, რომ ბრალდება, რომელიც შესაძლოა ბიჭს წაუყენონ უსამართლოა, რადგან გოგონა თავად მივიდა მასთან და უთხრა, რომ დედის მხრიდან ძალადობის მსხვერპლი იყო და თუ არ მოიყვანდა ცოლა თავს მოიკლავდა.
ამის შესახებ ბავშვის მამის, მიშა დვალიშვილის ნათლიამ და მამიდამ ისაუბრეს:
„თვითონ ჩამოვიდა ეს გოგო თავიდან, დაურეკა, ძალადობის მსხვერპლი ვარო და თუკი არ შემიფარებ და არ წამიყვანო, თავს მოვიკლავო, ბავშვი იძულებული გახდა. არც ასაკი იცოდა, სხვათა შორის, სანამ მშობლები არ ჩამოვიდნენ და არ თქვეს, რომ პატარა იყო და არ შეიძლებოდა ჯერ გათხოვება და წასვლითაც, არც წაყვა და არც წაიყვანეს, მშობლებმაც არ იძალავეს. უდანაშაულოა ყველა ვარიანტში,“ – განაცხადა ნათლიამ, ელგა ოდოსაშვილმა.
მიხეილ დვალიშვილის მამიდა, ნონა დვალიშვილიც იმავეს ამბობს, რასაც 20 წლის ახალგაზრდის ნათლია. ნონა დვალიშვილი ამტკიცებს, რომ ოჯახმა არასრულწლოვანი უკან არ წაიყვანა.
„ნამდვილად არ უნდა დააკავონ, ჯერ არ იცოდა რა ასაკის იყო. გამოექცა დედას, ამბობდა, რომ დედის გამო წამოვედი, მიშველეთ, თუ არა თავს მოვიკლავ და ამ ბავშვმა შეიფარა. მშობლები ჩამოვიდნენ, ასაკი კი გავიგეთ, მაგრამ არ გაჰყვა მშობლებს და არ უძალადიათ წაყვანა და მართლა მსხვერპლია მიშო,“ – განაცხადა მამიდამ, ნონა დვალიშვილმა.
შეგახსენებთ, გავრცელდა ინფორმაცია, რომ მიშა დვალიშვილს შესაძლოა ბრალი წაუყენონ მუხლით, რომელიც 18 წლამდე მიუღწეველ პირთან სქესობრივ კავშირს გულისხმობს.