ეროვნული ბანკის პრეზიდენტი კობა გვენეტაძე ლარის გაუფასურების მიზეზებს შორის დოლარის გამყარების ტრენდსა და თურქული ლირის კურსის ვარდნას ასახელებს.
მისი თქმით, გაცვლით კურსზე მრავალი ფაქტორი ახდენს გავლენას და მათ უმეტესობაზე ინფორმაცია რამდენიმე თვის შემდეგ იქნება ხელმისაწვდომი. შესაბამისად, გვენეტაძის განმარტებით, ვალუტის კურსის მიმდინარე დინამიკის ახსნა ყოველთვის არ არის შესაძლებელი და ამ მიზეზის გამო, ცენტრალური ბანკები, ეკონომიკური პროფილის საერთაშორისო ორგანიზაციები მიმდინარე კურსზე ან მოკლევადიან რყევებზე, კომენტარს არ აკეთებენ.
მისი თქმით, ზოგადად, ფუნდამენტური ფაქტორები გაუმჯობესებულია, თუმცა ამ ეტაპზე, სრული სურათის დანახვა შეუძლებელია, რადგან პირველი კვარტლის საგამხდელო ბალანსი მოგვიანებით იქნება ცნობილი.
„მსხვილი ფაქტორებიდან აღსანიშნავია, რომ ზოგადად, დოლარს გამყარების ტენდენცია ახასიათებს და ამ წლის განმავლობაში, ეს ინდექსი საკმაოდ მზარდია. ამავე დროს, თურქული ლირის გაუფასურება ხდება, რომელიც ლარის კურსსაც გადმოეცემა, მაგრამ რადგანაც გაცვლითი კურსი და მცურავი გაცვლითი კურსი შთანთქმით ფუნქციას ასრულებს, შეიძლება ვთქვათ, რომ სხვა თანაბარ პირობებში, ასეთ გაუფასურებას შემდგომ გამყარება მოჰყვება ხოლმე“, – განაცხადა კობა გვენეტაძემ.
მისი თქმით, ბოლო სამი წლის სტატისტიკური ინფორმაციის გათვალისწინებით, ამის მაგალითი თვალშისაცემია. ამასთან, ეროვნული ბანკის პრეზიდენტის ინფორმაციით, მნიშვნელოვანია საერთაშორისო რეზერვების საკითხიც.
„ეროვნული ბანკის საერთაშორისო რეზერვები ხანგრძლივი დროის განმავლობაში არაადეკვატური იყო, მაგრამ ამ ეტაპზე, რეზერვების მოცულობა დაუახლოვდა მინიმალურ ადეკვატურ დონეს, რაც მნიშვნელოვანია ქვეყნისთვის. ეს ნიშნავს, რომ მომავალში რეზერვების აქტიური შესყიდვის აუცილებლობა აღარ არის და აღარ დგას ისე, როგორც ადრე იყო. რა თქმა უნდა, ჩვენ გავაგრძელებთ ზრუნვას რეზერვების გაზრდაზე. გამყარების პერიოდში ვყიდულობდით ხოლმე, მაგრამ ამ ეტაპზე, რეზერვების აქტიური შესყიდვების აუცილებლობა არ დგას“, – განაცხადა კობა გვენეტაძემ.
მისი თქმით, ეკონომიკური სტაბილურობის ზრდისთვის მნიშვნელოვანია ინფლაცია და არა, გაცვლითი კურსი.
„საქართველოში ინფლაცია არის ზომიერ ფარგლებში. წლიური ინფლაცია 4.1 პროცენტს შეადგენს, მაგრამ არ უნდა დაგვავიწყდეს, რომ ამ ინფლაციაში არის ერთჯერადი ფაქტორების როლი – აქციზის გავლენა, რომელიც 1.3 პროცენტია; ამავე დროს, ნავთობის ფასებიც გაიზარდა, რაც ასევე ეგზოგენური ფაქტორია და როგორც წესი, ცენტრალური ბანკები, რომლებიც ინფლაციის სტაბილურობას ახორციელებენ, ასეთ ეგზოგენურ ფაქტორებზე რეაგირებას არ ახდენენ“, –განაცხადა კობა გვენეტაძემ.
როგორც ეროვნული ბანკის პრეზიდენტი აღნიშნავს, ლარის გაუფასურების ერთ-ერთი მიზეზი არის მეზობელ ქვეყანაში მიმდინარე მოვლენები.
„საკმაოდ რთული ეკონომიკური სიტუაციაა, ინფლაცია დაახლოებით 20 პროცენტია და თურქული ლირა საკმაოდ დიდი ხნის განმავლობაში უფასურდებოდა. ეკონომიკური ზრდა, თუ არ ვცდები, 2019 წელს იქნება -2.5 პროცენტი, რაც არ არის კარგი, როდესაც პარტნიორ ქვეყანაში ხდება ასეთი შემცირება ეკონომიკის. ჩვენს პროდუქციაზე მოთხოვნის გათვალისწინებით, რა თქმა უნდა, აისახება საქართველოზეც“, – აღნიშნა კობა გვენეტაძემ.
ამასთან, როგორც ეროვნული ბანკის პრეზიდენტმა აღნიშნა, გადმორიცხვები გაზრდილია.
„ვფიქრობ, გარკვეულწილად, მოლოდინებიც თამაშობს როლს ამ შემთხვევაში, მაგრამ თუ გადავხედავთ ბოლო სამი წლის პერიოდს, როგორც წესი, მოკლევადიან რყევებს, გაუფასურებას შემდეგ გამყარება მოსდევს ხოლმე და ზუსტად ეს არის დადებითი თვისება მცურავი გაცვლითი კურსის, საშუალო და გრძელვადიან პერიოდში ის აუცილებლად დებს შედეგს, რომელიც ეკონომიკისთვის არის კარგი“– განაცხადა კობა გვენეტაძემ.