საპარლამენტო უმრავლესობის ლიდერის, მამუკა მდინარაძის შეფასებით, ოპოზიციას აშინებს ის ფაქტი, რომ საქართველოში გიგი უგულავას საქმის შესასწავლად ევროპარლამენტართა შემადგენლობით მისია ჩამოდის.
მისივე თქმით, “ნაცმოძრაობას” სიმართლის დადგენა არ აწყობს.
„მათი პათოსი, მათი პანიკური გამოვლინებები რაც მათ განცხადებებზე აისახა, ნიშნავს იმას, რომ ერთადერთი რაც ყველაზე ძალიან არ აწყობს „ნაციონალურ მოძრაობას“, არის ფაქტის დადგენა, რადგან ფაქტები ყოველთვის მათ საწინააღმდეგოდ მეტყველებს. ჩვენ ვნახეთ “რუსთავი 2”-ის შემთხვევა, როცა ფაქტები სხვა იყო და მათი შეფასებები სხვა, როცა სტრასბურგმა თქვა, რომ “რუსთავი 2”-ის მაშინდელი მენეჯმენტი, ნიკა გვარამია, “ნაცმოძრაობა”, ბათუ ქუთელიები, არასამთავრობო სექტორი იტყუებოდა. ამის შემდეგ იყო ეუთო-ოდირი, სადაც ითქვა, რომ ეს ის ადგილი არ არის, სადაც უნდა დადგინდეს ნორმის კონსტიტუციურობა. ახლა დადგნენ ფაქტის წინაშე, რომ შეიძლება ფაქტების შემსწავლელმა მისიამ, ევროპარლამენტმა დაადგინოს, რომ ისევ იტყუებიან და აქედან გამომდინარეობს მათი განცხადებები.
ევროპარლამენტარებმა ამასთან დაკავშირებით გამოთქვეს უკვე თავიანთი პოზიცია და თქვეს, რომ ეს არის ძალიან კარგი ინიციატივა და სტრასბურგის სასამართლო შეიძლება გაიწელოს, თუ საერთოდ გაასაჩივრებენ, იმიტომ რომ უზენაეს სასამართლოში არ გაუსაჩივრებიათ საერთოდ, თუ სტრასბურგში გაასაჩივრებენ, შეიძლება ეს დროში გაიწელოს და უფრო სწრაფი რეაგირება ამაზე შეიძლება მოახდინოს ამ დასკვნამ,“ – განაცხადა მამუკა მდინარაძემ.
შეგახსენებთ, კახა კალაძემ და ირაკლი კობახიძემ უგულავას საქმის შესასწავლად ევროპარლამენტის წარმომადგენლებს საქართველოში ჩამოსვლა პირადად შესთავაზეს.