ვინ უწყობს ხელს კორუფციას სასამართლოში

გაზეთი „ალია“ სასამართლო სისტემაში არსებული დარღვევების შესახებ სტატიას აქვეყნებს. სტატიაში იმ მოსამართლეების შესახებაა საუბარი, რომლებიც ბიზნესმენ ვანო ჩხარტიშვილის სარჩელებს უკავშირდებიან.
“ყველა ინსტანციამ ვანოს მოუჩლიქა ენა და თვალები დაუპაჭუნა, თუმცა აუცილებლად გამოვყოფთ თვალსაჩინო დეტალებს და მოსამართლეების “გმირობას”. 2014 წლის, 22 ივლისს, თბილისის საქალაქო სასამართლოს მოსამართლე ტარიელ ტაბატაძემ, ვანო ჩხარტიშვილს, ბადრი პატარკაციშვილთან 2004 წლის ე.წ. ზეპისიტყვიერი შეთანხმება “გაუპრავა”, რის გამოც ლონდონის სასამართლომ ვანო ხაფანგში გააბა, ტაბატაძემ ლანგარზე მიართვა გადაწყვეტილება და დაადგინა:
“დადგენილ იქნეს ივანე ჩხარტიშვილს და არკადი (ბადრი) პატარკაციშვილს შორის 2004 წელს ზეპირი დავალების ხელშეკრულების დადების ფაქტი, რომლის თანახმად ივანე ჩხარტიშვილმა დაავალა, ხოლო არკადი (ბადრი) პატარკაციშვილმა იკისრა ვალდებულება დაეფუძნებინა უცხოური კომპანია, რომელიც მოსარჩელის ბენეფიციარულ საკუთრებაში უნდა ყოფილიყო და ივანე ჩხარტიშვილი ცნობილ იქნეს ამ კომპანიის “კოპელა ვენჩერს ლიმიტედის” ბენეფიციარ მესაკუთრედ. დადგენილ იქნეს, რომ ივანე ჩხარტიშვილი იყო სამი უძრავი ქონების, კერძოდ, უნივერმაღ „თბილისის“, მიწის ნაკვეთის და შენობა-ნაგებობების ლილოში და ქ. თბილისში, ფხოვის ქ. #3-ში მდებარე მიწის ნაკვეთის ბენეფიციარი მესაკუთრე “კოპელა ვინჩერს ლიმიტედის” მიერ მათი გაყიდვის მომენტში და ამ უძრავი ქონებების რეალიზაციიდან მიღებული ნებისმიერი შემოსავალი და სარგებელი ეკუთვნის ივანე ჩხარტიშვილს”.
სხვათა შორის, პირველი ინსტანციის სასამართლოში ამ საქმეს მოსამართლე კაკაბაძე იხილავდა, რომელმაც რამდენიმე სხდომა ჩაატარა, მოწმეები დაკითხა და როდესაც ადვოკატებს შორის საპაექრო ეტაპი დადგა, სხდომის დასრულებამდე, მოულოდნელად მოსამართლე კაკაბაძე შეიცვალა და საქმე მოსამართლე ტაბატაძემ გადაიბარა.
“ბლუ ტროპიკისა” და “კოპელას” ადვოკატებმა ეს ფაქტი იუსტიციის საბჭოშიც გაასაჩივრეს, მაგრამ მოსამართლე ტაბატაძემ, რომელსაც მოწმეების დაკითხვის მიუხედავად, არავითარი კითხვა არ გასჩენია, მოკლე დროში, “ოპერატიულად”, ვანო ჩხარტიშვილის სარჩელი მაინც დააკმაყოფილა. მოსამართლე ტაბატაძის ეს გადაწყვეტილება “ბლუ ტროპიკისა” და “კოპელას” ქართველმა ადვოკატებმა სააპელაციო სასამართლოში გაასაჩივრეს, სადაც მოსამართლე ტაბატაძის გადაწყვეტილება გაუქმდა. ამის შემდეგ, ბიზნესმენმა სააპელაციო სასამართლოს გადაწყვეტილება უზენაეს სასამართლოში გაასაჩივრა, უზენაესმა სასამართლომ კი საქმე ისევ სააპელაციოში დააბრუნა, თუმცა სააპელაციო სასამართლო ამ დრომდე დუმს და არაა დაზუსტებული, როდის ჩაინიშნება პროცესი, დიდი ბრიტანეთის სამეფო სასამართლოს გადაწყვეტილება დაგზავნილია ყველა სასამართლოში, მათ შორის სააპელაციოში და იმედია, ცოდნასა და კვალიფიკაციას აიმაღლებენ, როცა მოსამართლე პიტერ სმიტის წარმოებული პროცესის დეტალებს გაეცნობიან და ქართულ მართლმსაჯულებას გაეხნება გონება და პროფესიული ნორმებით იხელმძღვანელებს”, – ნათქვამია სტატიაში.
ამავე სტატიაში საუბარია საქალაქო სასამართლოს მოსამართლე გიორგი სულაკაძეზე, რომელმაც “თი-ბი-სი ბანკის”, შპს “აგრიკომის”, შპს “პორტლენდის”, შპს “ტრანსფორდის” წინააღმდეგ ვანო ჩხარტიშვილის სარჩელის განხილვა პროცესუალური ნორმების სრული უგულებელყოფით წარმართა. “თი-ბი-სი ბანკის” იურისტებმა საჩივრით და განცხადებებით იუსტიციის უმაღლეს საბჭოს, მთავარ პროკურორს და უზენაესი სასამართლოს თავმჯდომარეს ჯერ კიდევ გასულ წელს მიმართეს, თუმცა ამ ფაქტებს რეაგირება ამ დრომდე არ მოყოლია.
“არჩევნები მოდის, სამართლიანობის აღდგენით მოსული ხელისუფლება ახლა მაინც დაინტერესდეს, რა ხდება სასამართლოებში და რას უპირებენ სამართლის მოლოდინში მყოფ ადამიანებს?”, – წერს გაზეთი “ალია”.