ეს არ არის პოლიტიკური დევნა, ეს არის მათი მხრიდან პოლიტიკური მიმალვა. არავინ დედამიწის ზურგზე არ უარყოფს, რომ ნიკა მელია არღვევდა და ახლაც არღვევს კანონს, – ამის შესახებ საპარლამენტო უმრავლესობის წევრმა, შალვა პაპუაშვილმა განაცხადა.
მისი თქმით, როცა კანონი ირღვევა ამას სჭირდება შესაბამისი რეაქცია.
„აქაც რაიმე კითხვის ნიშანი არ არსებობს. ნიკა მელია არღვევს კანონს და ჩვენ ვალდებულნი ვართ, ამას მივცეთ რეაქცია, რადგან ეს არ იყო ჩვეულებრივი კანონდარღვევა, ეს იყო მართლმსაჯულების და სამართლებრივი სისტემის გამოწვევა. სასამართლოს რაც შეეხება, ჩვენ გუშინ მივეცით თანხმობა პროკურატურას. იქიდან გამომდინარე, რომ ჩვენი გადმოსახედიდან პროკურატურის შუამდგომლობა იყო დასაბუთებული. ვნახოთ, ამას სასამართლო გაიზიარებს თუ არა. ის, რაც ახლა ხდება „ნაციონალური მოძრაობის“ ოფისში, ეს არათუ მცდელობაა, არამედ ასრულება იმ გეგმის, რომელზეც ჩვენ უკვე დიდი ხანია ვსაუბრობთ და თავადაც ღიად საუბრობენ, რომ მათი მიზანია გაზაფხულზე დაიწყონ მღელვარების ორგანიზება. მართალია, დღეს თოვლი მოვიდა და გაზაფხული ჯერ როგორც ჩანს, არ დგება, მაგრამ ვატყობთ, რომ ეს მცდელობები არის და ყველა ეს მცდელობა არის ფუჭი ორი მიზეზის გამო. პირველი-ეს ყველაფერი არის კანონის საწინააღმდეგო და ჩვენ ასეთ კანონსაწინააღმდეგო მოქმედებებს არ დავუშვებთ, მეორე-მათ არანაირი მხარდაჭერა არ აქვთ მოქალაქეებში, ეს ჩანს ყოველი ფეხის ნაბიჯზე, მათი მხარდაჭერა არის ნული. შესაბამისად, მათ აქ რაიმე პერსპექტივა არ აქვთ“, – განაცხადა პაპუაშვილმა.