მივესალმები ოპოზიციის წარმომადგენლების საპარლამენტო ცხოვრებაში ჩართვას და ვისურვებ საკანონმდებლო ორგანოში ვიხილო ოპოზიციის ის ნაწილიც, რომელიც პოლიტიკური პროცესების გამწვავებას ქუჩაში ცდილობს, – ამის შესახებ პირველმა ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა პარლამენტში მინისტრის საათზე გამოსვლისას განაცხადა.
ვიცე-პრემიერმა მიმდინარე პროექტებზე და სამომავლო გეგმებზე საუბრისას აღნიშნა, რომ სამთავრობო გუნდის მიზანია ქვეყნის სტაბილური განვითარება და 2024 წელს ევროკავშირის სრულფასოვანი წევრობისთვის განაცხადის წარდგენა, ამ პროცესში კი მნიშვნელოვანი როლი აკისრია რეგიონული განვითარებისა და ინფრასტრუქტურის სამინისტროს, მათ შორის ევროპის სატრანსპორტო ქსელში ინტეგრაციის მიმართულებით.
„ჩემი გამოსვლა პირველი არ არის მე-10 მოწვევის პარლამენტის წინაშე, თუმცა დღეს საპარლამენტო ზედამხედველობის ძალიან მნიშვნელოვანი მინისტრის საათის ფორმატში ვარ პირველად და მინდა, შემთხვევით ვისარგებლო, მივესალმო ოპოზიციას ამ დარბაზში და იმედი გამოვთქვა, რომ ოპოზიციის ის ნაწილი, რომელიც დღეს ჯერ კიდევ ქუჩიდან დესტრუქციული ქმედებებით არის დაკავებული, ასევე დაიკავებს პარლამენტში განკუთვნილ ადგილებს.
როგორც მოგეხსენებათ, სამთავრობო გუნდის გაცხადებული მიზანია ქვეყნის სტაბილური, სრულფასოვანი განვითარება და 2024 წელს ევროკავშირის სრულფასოვანი წევრობისთვის განაცხადის წარდგენა. ამ მხრივ, რეგიონული განვითარებისა და ინფრასტრუქტურის სამინისტროს მნიშვნელოვანი მისია აკისრია – პირველ რიგში, ეს არის ისეთი სახის საერთშორისო ინფრასტრუქტურის მოწყობა, რომელიც უფრო სწრაფად დაგვაკავშირებს ევროკავშირთან, ანუ უშუალოდ ინტეგრაცია ევროპის სატრანსპორტო ქსელში, ინფრასტრუქტურის განვითარება და რეგიონებში ეკონომიკური განვითარების დონის მიახლოება ევროპულ დონესთან, ასევე არანაკლებ მნიშვნელოვანია ევროპული ტიპის ადგილობრივი თვითმმართველობის ჩამოყალიბება და ინსტიტუციური დაახლოვება ევროკავშირის მართვის მოდელთან“, – განაცხადა ცქიტიშვილმა.