შს სამინისტროს გადაწყვეტილება, ნიკა მელიას საქმეზე დაგეგმილი ღონისძიება გადადების შესახებ, შექმნილმა სიტუაციამ გამოიწვია, – ამის შესახებ უმრავლესობის წევრმა, შალვა პაპუაშვილმა „დღის ქრონიკაში“ განაცხადა.
მისი თქმით, ამ შემთხვევაში შინაგან საქმეთა სამინისტრომ სწორი გადაწყვეტილება მიიღო.
„პრემიერ-მინისტრის გადადგომასთან ერთად მთავრობაც გადამდგარია და მინისტრების უფლებამოსილების შემსრულებლები არიან. რა თქმა უნდა, ამ შემთხვევაში სწორი გადაწყვეტილება მიიღო შინაგან საქმეთა სამინისტრომ, რომ უფრო მეტი სიცხადე ყოფილიყო საზოგადოებისთვისაც და ზოგადად, მონაწილეებისთვისაც. რაც შეეხება გადაწყვეტილების აღსრულებას, ირაკლი კობახიძემ ბრიფინგზე განაცხადა, რომ აღსრულების საკითხი ისევ დგას დღის წესრიგში და არაფერი შეცვლილი იმ კუთხით. თავად ჩვენი ოპონენტების შეფასებით, ნიკა მელია არ ასრულებდა 3 ნოემბრის სასამართლოს გადაწყვეტილებას გირაოს დამძიმების თაობაზე და ახლა უკვე ახალ გადაწყვეტილებას არ ასრულებს. იცით, რომ სამართალდამცავი მივიდნენ, რათა ჩაებარებინათ მისთვის სასამართლოს გადაწყვეტილება და მიეცათ შესაძლებლობა ნებაყოფლობით აღესრულებინა ეს გადაწყვეტილება. ამით კვლავ სრულდება კანონს მიღმა დგომა ნიკა მელიას მხრიდან და როგორც ჩანს, ჩვენი ოპონენტებიც ზურგს უმაგრებენ“, – განაცხადა შალვა პაპუაშვილმა.