“პარტნიორების დამოკიდებულება საქართველოს მიმართ მეგობრულია, მათ უნდათ, რომ არ იყოს დესტაბილიზაცია და ყველას სიდინჯისკენ მოუწოდებენ”

ვხედავთ, რომ ჩვენი პარტნიორების დამოკიდებულება საქართველოს მიმართ მეგობრულია, მათ უნდათ, რომ დესტაბილიზაცია არ იყოს და ყველას სიდინჯისკენ მოუწოდებენ, – ამის შესახებ საპარლამენტო უმრავლესობის წევრმა, შალვა პაპუაშვილმა განაცხადა.

როგორც შალვა პაპუაშვილმა აღნიშნა, ოპოზიციური პარტიების ნაწილი საარჩევნო რეფორმის პროცესში არ მონაწილეობს, სწორედ ეს არის დესტრუქცია და თავქარიანობა.

„ევროპის სახალხო პარტიასა“ და „ნაციონალურ მოძრაობას“ შორის განსაკუთრებული ბმა არის. იცით, რომ „ნაციონალური მოძრაობა“ ამ EPP-ის წევრია. ასეთი გამოხმაურება სხვა მხრიდან არ ყოფილა. ვხედავთ, რომ ჩვენი პარტნიორების დამოკიდებულება საქართველოს მიმართ მეგობრულია. მათ უნდათ, დესტაბილიზაცია არ იყოს და ყველას სიდინჯისკენ მოუწოდებენ. ყველამ თავისი წილი პასუხისმგებლობა უნდა აიღოს. ვიღაც უნდა იყოს დინჯი და ვიღაც თავქარიანი, ასე არ არის. საარჩევნო რეგორმის პროცესში ოპოზიციური პარტიების ნაწილი არ მონაწილეობენ. ეს არის სწორედ დესტრუქცია და თავქარიანობა. ჩვენს ოპონენტებს ყველა მოუწოდებს, პარლამენტში შემოვიდნენ და დემოკრატიულ პროცესებში მონაწილეობა მიიღონ. დროებითი საგამოძიებო კომისია სხვა არაფერია, თუ არა, დიალოგის გადმოტანა პროცესში, რათა შევთანხმდეთ, რა არის სიმართლე. თუ სიმართლეზე ვერ შევთანხმდებით, ჰაერზე ბრალდებების სროლა თითქოს არჩევნები გაყალბდა, არასწორია. ნიკა მელიას მხრიდან კანონის დარღვევას ვხედავთ. ასევე ძალადობას ქართულ სამართლებრივ სისტემაზე და მართლწესრიგზე. კანონი ირღვევა იმით, რომ ნიკა მელია ვალდებულებას არ ასრულებს და ამაში მას ოპოზიციონერები ეხმარებიან“, – განაცხადა შალვა პაპუაშვილმა.