ევროკავშირთან ინტეგრაცია, ევროკავშირის წევრობაზე განაცხადი ეს არის მთავარი ამოცანა, რომელზეც აგებულია ყველა ის პროექტი, მიმართულება რაც დღეს ჩვენ გვაქვს, – ამის შესახებ პარლამენტში, კომიტეტების გაერთიანებულ სხდომაზე რეგიონული განვითარებისა და ინფრასტრუქტურის მინისტრობის კანდიდატმა ირაკლი ქარსელაძემ განაცხადა.
„დანერგილია პროექტების შერჩევის შეფასების ევროპული სტანდარტი, ისე როგორც რეგიონებში, ოღონდ ევროკავშირის წევრი ქვეყნები არჩევენ ამ პროექტებს. ასევე უმნიშვნელოვანესია სტატისტიკური კრიტერიუმები, სწორედ იგივე ევროკავშირის სტანდარტის შესაბამისად, რომელიც საშუალებას გაძლევს მრავალმხრივ გამოყენება გააკეთო და უკვე ევროპასთან იმ საერთო ენაზე, საერთო სტატისტიკურ ბაზაზე და პრინციპებზე დაყრდნობით არა მარტო წარადგინო, არამედ მოამზადო შესაბამის პროექტები.
ამ ორი კომბინაციის გამოსახულებაა ის 4 საპილოტე რეგიონი: გურია, იმერეთი, რაჭა-ლეჩხუმი-ქვემო სვანეთი და კახეთი, სადაც უკვე დაწყებულია პროექტების შერჩევა და უმნიშვნელოვანესია ის რომ სწორედ ადგილობრივი თვითმართველობები არიან ინიციატორები ამ პროექტების. ასევე ვმუშაობთ, რომ ეს რეგიონები გავაფართოვოთ და სხვა რეგიონები ჩავრთოთ“, – განაცხადა ირაკლი ქარსელაძემ.
სახელმწიფომ, რეგიონების განვითარების მიზნით, მოამზადა საპილოტე რეგიონების ინტეგრირებული განვითარების პროგრამა.
საპილოტე რეგიონების ინტეგრირებული განვითარების პროგრამა ეფუძნება ევროკავშირის რეგიონული განვითარების პოლიტიკის უახლეს მიდგომებს. პროგრამის ფარგლებში, კახეთში, იმერეთში, გურიაში, რაჭა-ლეჩხუმსა და ქვემო სვანეთში დაფინანსდება დაახლოებით 63 მილიონი ევროს მიზნობრივი ღონისძიებები, რომელშიც ევროკავშირის მონაწილეობა 54 მილიონ ევრომდეა. დაფინანსების დიდი ნაწილი მოხმარდება რეგიონული ცენტრების ეკონომიკური, კულტურული და სოციალური როლისა და ფუნქციების გაძლიერებას, ახალი ურბანული მიზიდულობის კერების ჩამოყალიბებას, ყოფილი სამრეწველო, ინდუსტრიული ქალაქებისა და აუთვისებელი ტერიტორიების განახლებას.