“უნდა დაინახონ ჩვენმა აფხაზმა და ოსმა ძმებმა, რომ მათი მომავალი ჩვენ ერთიან სახელმწიფოში ცხოვრებაა”

ოკუპირებული ხაზის მეორე მხარეს მცხოვრებ დებსა და ძმებს ვთავაზობთ შესაძლებლობას ვიცხოვროთ ქვეყანაში, რომელიც არის დაფუძნებული საერთაშორისო სამართლის პრინციპებზე, ქვეყანაში, რომელიც არის დაფუძნებული ეროვნული უმცირესობის უფლებების პატივისცემის პრინციპებზე, ქვეყანაში, რომელიც მიისწრაფის ევროკავშირისკენ, ქვეყანაში, სადაც არის დაუნდობელი ბრძოლა გამოცხადებული კორუფციაზე და ყველა იმ მავნებელ მიმართულებაზე, რაც არის დამახასიათებელი ბევრი იმ რეჟიმისთვის, საითკენაც მათ აქვთ ლტოლვა, – ამის შესახებ 3 კომიტეტის გაერთიანებულ სხდომაზე საგარეო საქმეთა მინისტრობის კანდიდატმა დავით ზალკალიანმა განაცხდა.

მისი თქმით, საქართველოს ევროპისკენ მისწრაფება ცენტრალურ ხელისუფლებას ამ მიზნების განხორციელებაში ეხმარება. ზალკალიანმა ასევე აღნიშნა, რომ ოკუპირებული რეგიონების არაღიარების პოლიტიკა საგარეო უწყების ერთ-ერთ მთავარ პრიორიტეტად რჩება. მისი თქმით, 2012 წელს „ქართული ოცნების“ ხელისუფლებაში მოსვლის შემდეგ, იმ ექვსი ქვეყნიდან, რომლებმაც ოკუპირებული რეგიონების დამოუკიდებლობა აღიარეს, ორმა აღიარება უკან წაიღო.

„უნდა დაინახონ ჩვენმა აფხაზმა და ოსმა ძმებმა, რომ მათი მომავალი ჩვენ ერთიან სახელმწიფოში ცხოვრებაა და არ უნდა ჰქონდეთ იმის ილუზია, რომ ისინი იქნებიან აღიარებული საერთაშორისო თანამეგობრობის მხრიდან. ამას ადასტურებს ზუსტად ის კონკრეტული გადაწყვეტილებები იგივე სტრატეგიულ პარტნიორებთან, თუნდაც ის კონსოლიდირებული საბიუჯეტო აქტი, რომელიც ამერიკის შეერთებული შტატების კონგრესმა მიიღო სწორედ ჩვენი შეხვედრიდან ძალიან მალე; თავდაცვის ავტორიზაციის აქტი, სადაც პირდაპირ არის ჩადებული მნიშვნელოვანი ელემენტები, რაც არის დაკავშირებული სანქციებთან იმ ქვეყნებთან მიმართებაში, რომლებიც შეეცდებიან რაიმე სახის ფორმალური ურთიერთობა დაამყაროს ოკუპირებული ხაზის მეორე მხარეს მყოფ ე.წ. ხელისუფლების წარმომადგენლებთან“, – განაცხადა ზალკალიანმა.