72 წლის ნიკოლოზ რეხვიაშვილი პირველია, ვინ ვაქცინაციის წამახალისებელ ლატარიაში „აიცერი და მოიგე“ 10 ათასი ლარი მოიგო. მოგების შესახებ ჟურნალისტისგან, სატელეფონო ზარით გაიგო.
„პირველი დოზით აცრის შემდეგ, მოვიგე 10 ათასი ლარი. როცა დამირეკეს და მითხრეს, რომ მოვიგე, გამიკვირდა, რადგან ჩემთვის მოულოდნელი იყო. არ დავიჯერე, რადგან არასდროს არაფერი მომიგია. ერთხელ მოვიგე ერთი ცალი ნაყინი და მეზობლის ბავშვს მივეცი. ასეთი თანხის მოგება სასწაულივით იყო ჩემს ცხოვრებაში“, – ამბობს გამარჯვებული „იმედის დღესთან“ საუბრისას.
ნიკოლოზ რეხვიაშვილი ბოლნისში, მეუღლესთან და შვილთან ერთად ცხოვრობს. მას მდიდარი შემოქმედებითი ისტორია აქვს – 2 ათასზე მეტი ლექსის ავტორია. ამბობს, რომ მოგებულ თანხას სახლის რემონტს მოახმარს და თუ თანხა მორჩება, საკუთარი პოეტური კრებულის გამოცემას გეგმავს.
ნიკოლოზ რეხვიაშვილი ბოლნისში, „სინოფარმით“ აიცრა.
STOPCOVID – ლატარია „აიცერი და მოიგე“ იმართება საქართველოს მთავრობის ინიციატივით, ვაქცინაციის პროცესის სტიმულირების მიზნით. ლატარია დაიწყო 13 სექტემბერს, ხოლო პირველი გათამაშება 14 სექტემბერს შედგა. 27 დეკემბერს დასრულდება ყოველდღიური და ყოველკვირეული გათამაშება, ხოლო 31 დეკემბერს გაიმართება შემაჯამებელი გათამაშება.