მინდა მოსახლეობას ვუთხრა, რომ ამ კომიკური კაცის მორიგ ანონსზე ზედმეტ ემოციებს ნუ დავხარჯავთ, – ამის შესახებ ირაკლი ღარიბაშვილმა გადაცემაში „არჩევნები 2021“ მიხეილ სააკაშვილის საქართველოში დაბრუნების შესახებ გაკეთებულ ანონსზე საუბრისას განაცხადა. პრემიერ-მინისტრმა აღნიშნა, რომ ყოფილმა პრეზიდენტმა ჩამოსვლის შესახებ განცხადება არაერთხელ გააკეთა, თუმცა საზოგადოებას მის მიმართ აგრესიული დამოკიდებულება აქვს.
„სააკაშვილის მიმართ დიდი ზიზღი და აგრესიაა საზოგადოებაში, რომელიც არის ხანგრძლივი და მუდმივი, იმიტომ რომ შეიძლება პოლიტიკოსი და მმართველი მოგწონდეს ან არ მოგწონდეს, მაგრამ როცა მმართველის მიმართ გაქვს ზიზღი და აგრესია, ეს რჩება სამუდამოდ. აი ასეთი განწყობაა დღეს საზოგადოებაში. 75% – 80%-მდე, მე ასე ვიტყოდი, სააკაშვილის დაბრუნების და პოლიტიკურ ცხოვრებაში ჩართულობის წინააღმდეგია“, – განაცხადა პრემიერმა.
მისივე თქმით, თუ სააკაშვილი ჩამოვიდა, სახელმწიფო კანონის ფარგლებში იმოქმედებს.
„სახელმწიფო მოახდენს რეაგირებას კანონის შესაბამისად და, რა თქმა უნდა, ეს არასერიოზული კაცი შევა ციხეში“, – განაცხადა პრემიერმა.