“საქართველოს ყველა აკრიტიკებს, რომ “ოკუპირებული ტერიტორიების შესახებ“ კანონში დაგეგმილი ცვლილებები გააჩერა”

“აქ საუბარია არა იმაზე, რომ პასუხისმგებლობა მოეხსნას ადამიანებს, რომელიც ჩვენს ოკუპირებულ ტერიტორიებზე შედის, არამედ საუბარია იმაზე, რომ პირველ ეტაპზე, როცა ადამიანმა არც კი იცის, რომ ის ოკუპირებულ ტერიტორიაზე მოხვდა, სისხლის სამართლის წესით არ დაისაჯოს და იყოს ფინანსური ჯარიმა, ხოლო სისხლის სამართლის პასუხისმგებლობა იყოს განმეორებით შემთხვევაში. საქართველოს ორწლიანი სანქცია დაედო იმის გამო, რომ მოხდა პასუხისმგებლობის გამოყენება ევროსაბჭოს წევრი დეპუტატების მიმართ. სწორედ იმის გამო, რომ მათ მიმართ მოხდა კანონის გამოყენება, ქვეყანა დაისჯა – ორი წელი სანქცია გვედო და ევროსაბჭოს ეგიდით არც ერთი საერთაშორისო ღონისძიება არ ტარდებოდა. მთავარია არა ის, “ნაციონალური მოძრაობა“ გაგვაკრიტიკებს თუ არა, არამედ მთავარია ის, რომ ჩვენი ევროპელი ლიდერები და ევროპული სტრუქტურები არ აკრიტიკებდნენ საქართველოს და სანქციას არ ადებდნენ ქვეყანას, კანონში ცვლილებების მიუღებლობის გამო“, – განუცხადა ჟურნალისტებს ეკა ბესელიამ.

პარლამენტში ”ოკუპირებული ტერიტორიების შესახებ” კანონთან დაკავშირებული საკანონმდებლო პაკეტის განხილვა გაგრძელდება. კერძოდ, თავდაცვისა და და უშიშროების კომიტეტმა, დღევანდელ სხდომაზე, მიზანშეწონილად მიიჩნია ახალი პარლამენტის მიერ მთავრობის იმ საკანონმდებლო ცვლილებების პროექტის განხილვა, რომელიც ოკუპირებულ ტერიტორიებზე შესვლის წესის დარღვევისათვის პასუხისმგებლობის ლიბერალიზებას და სისხლის სამართლის პასუხისმგებლობის ნაცვლად, ადმინისტრაციულ პასუხისმგებლობის ამოქმედებას ითვალისწინებს.

შერიგებისა და სამოქალაქო თანასწორობის საკითხებში სახელმწიფო მინისტრის აპარატის ავტორობითა და მთავრობის ინიციატივით მომზადდა ცვლილებები “ოკუპირებული ტერიტორიების შესახებ“ კანონში და მასთან ერთად, “საქართველოს სისხლის სამართლის კოდექსსა“ და “საქართველოს ადმინისტრაციულ სამართალდარღვევათა კოდექსში“ მე-8 მოწვევის პარლამენტს პირველი მოსმენით მიღებული აქვს. საკანონმდებლო პაკეტს კენჭი 2013 წლის მაისში უყარეს და ამის შემდეგ განხილვის პროცესი აღარ გაგრძელებულა.

აღნიშნული ცვლილებების თანახმად, უცხო ქვეყნის მოქალაქე ან მოქალაქეობის არმქონე პირი, რომელიც ოკუპირებულ ტერიტორიებზე “ოკუპირებული ტერიტორიების შესახებ” კანონით დადგენილ წესს დაარღვევს, თავისუფლების აღკვეთის ნაცვლად, 400 ლარით დაჯარიმდება. შესაბამისად, პირის მიერ პირველ ჯერზე ოკუპირებულ ტერიტორიებზე შესვლის წესის დარღვევისთვის პასუხისმგებლობა სისხლის სამართლებრივი სანქციის ნაცვლად, ადმინისტრაციული წესით განისაზღვრება. სისხლისსამართლებრივი პასუხისმგებლობა ოკუპირებულ ტერიტორიებზე შესვლის წესის დარღვევისათვის კი იმ შემთხვევაში დადგება, თუ ასეთი ქმედება პირმა ადმინისტრაციული სახდელის შეფარდების შემდეგაც ჩაიდინა.