„ვივამედის“ კლინიკური დირექტორი ზურაბ ჩხაიძე აცხადებს, რომ საქართველოს ყოფილი პრეზიდენტის მიხეილ სააკაშვილის სასიცოცხლო პარამეტრები კრიტიკული ნამდვილად არ არის.
როგორც ზურაბ ჩხაიძემ აღნიშნა, ყველაფერი კეთდება, რომ მიხეილ სააკაშვილის ჯანმრთელობის მდგომარეობა დასტაბილურდეს.
„მე არ ვიცი, ვის რა ინფორმაცია აქვს, განსაკუთრებით დამძიმება რას ნიშნავს? არ არის არაფერი განსაკუთრებული, ადამიანის მდგომარეობა შეიძლება ითქვას, რომ არის ისეთი, როგორიც იყო წინა დღეებში, არის მომატებული სტრესული მდგომარეობა, მაგრამ საერთოდ მისი მდგომარეობის შესახებ ჩვენ სრული ინფორმაცია გვაქვს მიწოდებული და ვაწვდით პენიტენციური დაწესებულების სამედიცინო დეპარტამენტს. შეგიძლიათ, მიმართოთ სამედიცინო დეპარტამენტს და მიიღოთ სრული ინფორმაციას. მისი სასიცოცხლო პარამეტრები კრიტიკული ნამდვილად არ არის“, – განაცხადა ზურაბ ჩხაიძემ.
კითხვაზე აქვს თუ არა მიხეილ სააკაშვილის გადაადგილების პრობლემა, „ვივამედის“ დირექტორი აცხადებს, რომ ყოფილი პრეზიდენტი იმყოფება ნახევრადმწოლოარე მდგომარეობაში.
„ზოგადი სისუსტე აქვს, რა თქმა უნდა, არის გადაადგილების შესაბამისად პრობლემაც, აქვს თავბრუსხვევა, გულისრევის შეგრძნება და აქვს პერიოდულად კოორდინაციის დარღვევაც, მაგრამ ზუსტი ინფორმაცია შეგიძლიათ, მიიღოთ პენიტენციური დაწესებულების სამედიცინო დეპარტამენტში, სადაც ზუსტად არის აღწერილი მისი მდგომარეობა. ვერ გეტყვით სამომავლოდ რა და როგორ იქნება, მაგრამ ყველაფერი კეთდება, რომ მისი მდგომარეობა დასტაბილურდეს“, – განაცხადა ზურაბ ჩხაიძემ.