ვაკე-საბურთალოს პოლიციის მთავარ სამმართველოში გამოკითხვაზე კომპანია „გრინ სერვისის“ დამფუძნებელი, ლაშა ფურცხვანიძე იმყოფება.
„მე ვიყავი პირადად პასუხისმგებელი“, – განმარტა ლაშა ფურცხვანიძემ გამოკითხვაზე შესვლამდე.
პოლიციაში იკითხებიან მერიის თანამშრომლებიც. გრძელდება თბილისის მერიის გარემოს დაცვის საქალაქო სამსახურის უფროსის, გიგა გიგაშვილის გამოკითხვა.
შეგახსენებთ, ვაკის პარკში, შადრევანში სამი ბავშვი ბურთის ამოსატანად ჩავიდა, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის გოგონას მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა.
შინაგან საქმეთა სამინისტრომ გამოძიება სისხლის სამართლის კოდექსის 240-ე პრიმა მუხლით დაიწყო, რაც უსაფრთხოების წესების დარღვევას გულისხმობს, რასაც მოჰყვა ჯანმრთელობის ნაკლებად მძიმე ან მძიმე დაზიანება.