ფსიქოლოგების განცხადებით, ლაზარეს რეაბილიტაციას, რათა სრულად დაუბრუნდეს იმ ცხოვრებას, როგორიც მომხდარ შემთხვევამდე იყო, წინ არაფერი უდგას, – ამის შესახებ ვაკის პარკის შადრევანში დენის დარტყმის შედეგად დაშავებული ერთ-ერთი მოზარდის, ლაზარეს ახლობელმა, კოტე ზარნაძემ ჟურნალისტებს განუცხადა.
„კლინიკიდან გაწერეს და სახლში მიდის. ნორმალურად აზროვნებს. უკეთესად, ვიდრე გუშინ. გუშინ, როგორც გითხარით, მეხსიერებიდან ცოტა ამოვარდნები ჰქონდა. საჭმელი ჭამა. ფსიქოლოგებთან კონსულტაცია გაიარა და მათაც თქვეს, რომ ბავშვი არის სრულიად ჯანმრთელი. არანაირი პრობლემა არ აქვს და ასე ვთქვათ, მის რეაბილიტაციას, სრულად დაუბრუნდეს იმ ცხოვრებას, როგორიც მომხდარ შემთხვევამდე იყო, წინ არაფერი უდგას“, – განაცხადა ზარნაძემ.
ვაკის პარკის შადრევანში ბურთის ამოსაღებად ჩასულ სამ არასრულწლოვანს დენმა დაარტყა. ერთ-ერთი მათგანის გადარჩენა ვერ მოხერხდა. მომხდარ ფაქტთან დაკავშირებით, შინაგან საქმეთა სამინისტრომ გამოძიება დაიწყო.