ჩვენ ძალისხმევას არ ვიშურებთ ჯარის პოპულარიზაციისთვის, რამაც ვიცით, სადამდე უნდა მიგვიყვანოს და რა შედეგი უნდა მოგვცეს, – ამის შესახებ თავდაცვის მინისტრმა, ჯუანშერ ბურჭულაძემ საქართველოს პირველი არხის გადაცემაში „თავისუფალი ხედვა“ სტუმრობისას განაცხადა.
„ჩვენი ჯარის პოპულარიზაცია არის საკითხი, სადაც მთელი საზოგადოება უნდა იყოს გაერთიანებული. მე ვერ წარმომიდგენია, ამ პროცესს ვინმე აზიანებდეს, ან ეწინააღმდეგებოდეს, თუმცა თქვენ ხედავთ, რომ მასიური წინააღმდეგობა მიდის ამ პროცესის, არის ჯარის დისკრედიტაციის მცდელობა, ჯარში შუღლის ჩამოგდება და ა.შ. ჯარის პოპულარიზაცია ყველა ოჯახში უნდა შევიდეს, მნიშვნელობა არ აქვს, ოჯახი რამდენად გაჭირვებულია, ან მატერიალურად ძლიერი. რა თქმა უნდა, პირველ ეტაპზე ამას ვერ გავაკეთებთ რაღაც რადიკალური ნაბიჯების ხარჯზე. ეს გააზრებული გვაქვს და ამიტომ, პირველ ეტაპზე ძირითადი აქცენტი გაკეთებული იქნება ჩვენი საზოგადოებისთვის ჯარის გაცნობაზე. ჩვენ უნდა გავაცნოთ ჯარი საზოგადოებას და დავანგრიოთ ის კომუნისტური, თუ პოსტკომუნისტური სტერეოტიპი, რომ ჯარი არის ცუდი. ჩვენ ჯარში შევქმენით ის პირობები, რომ ნებისმიერი ადამიანისთვის იყოს მისაღები, ვგულისხმობ ყველა კომპონენტს და გვინდა, ეს გავხადოთ საინტერესო. ჯერ უნდა გავაცნოთ საზოგადოებას. საზოგადოებამ ჯერ უნდა გაიცნოს, მერე უნდა შეიყვაროს“, – განაცხადა ბურჭულაძემ.
გადაცემის წამყვანის შეკითხვაზე, რა არის ის თავდაცვითი ამოცანები, რასაც ჩვენი სამხედრო სამსახურის და სარეზერვო ჯგუფის სახეცვლილმა ფორმამ უნდა უპასუხოს, ჯუანშერ ბურჭულაძემ განაცხადა, რომ ჯარის პოპულარიზაცია არის საშუალება, რათა ქვეყანამ მიზანს მიაღწიოს, მიზანი კი უსაფრთხო გარემოს შექმნა, რისკების შემცირება და ისეთი ჯარის შექმნაა, რომელიც ბრძოლისუნარიანი იქნება და ნებისმიერი შემადგენლობის მოწინააღმდეგისთვის წინააღმდეგობის გაწევას შეძლებს.