მერიას არცერთი ნაბიჯი არ გადაუდგამს არაკანონიერად. ყველაფერი იყო გაკეთებული კანონის შესაბამისად. ყველაფერი გამოიკვეთება გამოძიების შედეგად. წინასწარ რაიმე განმარტებების გაკეთება, ვარაუდები, ეს არასწორი იქნება, მით უმეტეს, ჩემი მხრიდან, – ამის შესახებ დედაქალაქის მერმა, კახა კალაძემ ვაკის პარკში მომხდარი ტრაგედიის შესახებ საუბრისას განაცხადა.
მერის განმარტებით, ადგილზე ყველა სამუშაო პროექტის შესაბამისად შესრულდა.
„რაც იყო პროექტში მოცემული, აბსოლუტურად ყველაფერი შესაბამისად იქნა გაკეთებული. ჩემთვის გაუგებარი იყო პირველივე დღეებში, როდესაც საპროექტო კომპანია გამოვიდა და საუბრობდა იმაზე, რომ თითქოს ჩაძირული ტუმბოები არ უნდა ყოფილიყო. მაგალითისთვის მომყავს ეს ერთ-ერთი, რაც ძალიან მენიშნა და გაუგებარი იყო ჩემთვის, თითოეული თანამშრომლისთვის, რომ თითქოს ჩაძირული ტუმბოები შადრევანში არ უნდა ყოფილიყო. რა თქმა უნდა, თქვენ შეგიძლიათ, ამოიღოთ ეს პროექტი, ხელმისაწვდომია, სადაც თეთრზე შავით წერია, რომ არსებული პროექტის განხორციელებისას მოცემული იყო ჩაძირული ტუმბოები, შესაბამისად, ყველაფერი გაკეთდა ისე, როგორც პროექტში იყო ეს გათვალისწინებული. ასევე, იყო ერთი ცვლილება პროექტში, რომელიც განხორციელდა და ეს ცვლილებაც დამპროექტებლებთან შეთანხმებით იქნა განხორციელებული. მერიას არცერთი ნაბიჯი არ გადაუდგამს არაკანონიერად. ყველაფერი იყო გაკეთებული კანონის შესაბამისად.
ყველაფერი გამოიკვეთება გამოძიების შედეგად. წინასწარ რაიმე განმარტებების გაკეთება, ვარაუდები, ეს არასწორი იქნება, მით უმეტეს, ჩემი მხრიდან, ადამიანისგან, რომელიც დაინტერესებულია, რომ გაირკვეს სიმართლე. ამიტომ, დაველოდოთ გამოძიებას და ყველაფერი იქნება ცხადი, რა იყო პრობლემა, რამ ვერ იმუშავა, რამ გამოიწვია ეს ყველაფერი, რატომ მოხდა ეს ტრაგიკული და უბედური შემთხვევა,” – განაცხადა კახა კალაძემ.
შეგახსენებთ, რომ 13 ოქტომბერს, ვაკის პარკის ახლად რეაბილიტირებულ შადრევანში 3 ბავშვს დენმა დაარტყა. მათ შორის, ერთ-ერთი 13 წლის მარიტა მეფარიშვილი გარდაიცვალა.