საქალაქო სასამართლოში გივი თარგამაძის მანქანის აფეთქების საქმეზე წინასასამართლო სხდომა გაიმართა.
ცნობილი გახდა, რომ ბორის ჩაგუნავას საქმე პროკურატურამ 28 დეკემბერს ცალკე ეპიზოდად გამოყო ხეჩუაშვილის საქმისგან, რომელიც განზრახ მკვლელობის მცდელობაშია ბრალდებული. ხეჩუაშვილი ამ დრომდე იძებნება.
პროკურატურა კი გამოძიებას განაგრძობს, რაც შეეხება ბორის ჩაგუნავას, გამოძიება მას ასაფეთქებელი მოწყობილობის და იარაღის უკანონოდ შენახვას ედავება.
ბრალდებული დანაშაულს აღიარებს. მისმა ადვოკატმა მოსამართლეს პატიმრობის გირაოთი შეცვლის შუამდგომლობით მიმართა, თუმცა მოსამართლემ ეს შუამდგომლობა არ დააკმაყოფილა.
მოსამართლემ ბორის ჩაგუნავას ბრალდებაზე საქმის განხილვა 26 იანვარს ჩანიშნა.
4 ოქტომბერს, დეპუტატ გივი თარგამაძის მანქანა კოლმეურნეობის მოედანზე, ნაციონალური მოძრაობის ოფისთან, ააფეთქეს. შინაგან საქმეთა სამინისტრომ ყოფილი “პირიმზის” მიმდებარე ტერიტორიაზე გივი თარგამაძის ავტომობილის აფეთქების ფაქტზე გამოძიება სისხლის სამართლის კოდექსის 19-109 მუხლით დაიწყო, რაც დამამძიმებელ გარემოებებში ჩადენილ განზრახ მკვლელობის მცდელობას გულისხმობს. 4 ოქტომბერს მომხდარი აფეთქების შედეგად, რამდენიმე ადამიანი დაშავდა.