თქვენი ბელადის კამპანიაზე, რომ კვდება, მოვწამლეთ, ვაწამეთ, რატომ აღარ ამბობთ არაფერს? გადარჩა სააკაშვილი, თუ აღდგა?, – ასე მიმართა საქართველოს პრემიერ-მინისტრმა, ირაკლი ღარიბაშვილმა „ნაციონალურ მოძრაოაბას“ პარლამენტში, სადაც ის წლიურ ანგარიშს წარადგენს.
ირაკლი ღარიბაშვილის განცხადებით, ბოლო პერიოდში ოპოზიციის წარმომადგენლებმა დიდი ზიანი მიაყენეს ქვეყანას იმ კამპანიით, რაც მიხეილ სააკაშვილთან დაკავშირებით მიმდინარეობდა.
„გაუბედურებული, საცოდავები ხართ, რადგან არაფერი სათქმელი აღარ გაქვთ არცერთი მიმართულებით. ბოლო პერიოდში რაც ჩაიდინეთ, ამით გესმით, რამხელა ზიანი მიაყენეთ ჩვენს ქვეყანას? თქვენი ბელადის კამპანიაზე, რომ კვდება, მოწამლეთ, ვაწამეთ – სად ხართ, რატომ აღარ ამბობთ არაფერს? გადარჩა სააკაშვილი თუ აღდგა?“, – მიმართა პარლამენტში ირაკლი ღარიბაშვილმა ოპოზიციას.
ამასთან, როგორც ირაკლი ღარიბაშვილმა აღნიშნა, ყველაზე მეტად ვინც დააზიანა ქვეყნის ინტერესები, ეს არის შიდა მტრული ძალა.
„ჩვენს დეგრადირებულ, გაუბედურებულ, დესტრუქციულ ოპოზიციას სათქმელი არაფერი აქვს. უსუსური მცდელობაა, რომ პირად შეურაცხყოფებზე გადმოდიან. სხვა სათქმელი არაფერი აღარ აქვთ. ამიტომ თუ ვინმემ რაიმე გააკეთა ანტიქართული, აგერ არის ეს ძალა. თუ ვინმემ რაიმე ანტიქართული გააკეთა ბოლი 30 წლის განმავლობაში, ვინც ყველაზე მეტად დააზიანა ჩვენი ქვეყნის ინტერესები, ეს არის შიდა მტრული ძალა, რომელმაც ძალიან ბევრი ზიანი მიაყენა ჩვენს ქვეყანას, ჩვენი ქვეყნის ტერიტორიები ჩააბარა, რუსული ჯარი გასული იყო 2007 წელს. მომისმინონ ქართველებმა, რაღაც ტაქტიკა აქვთ, ქალბატონებს მოგვიქსევენ შეურაცხყოფებით და შემდეგ ელოდებიან რეაქციას. ეს ძალიან მარტივი პროვოკაციებია. თქვენზე ემოციების დახარჯვას არ ვაპირებ. მინდა, ხალხს ველაპარაკო და კიდევ ერთხელ შევახსენო ჩვენს კოლეგებს თქვენი მოღალატეობრივი საქმიანობა. ტერიტორიები ჩააბარეს, 2007 წელს გავიდა რუსული ჯარი ქვეყნიდან, რამდენიმე თვეში შემოაბრუნეს. თავდაცვის მინისტრი ვიყავი, მანამდე შს მინისტრი, ორჯერ პრემიერ-მინისტრი და ძალიან კარგად ვიცი ყველა თქვენი ნაბიჯის შესახებ, რაც გაკეთებული გაქვთ. სამწუხაროდ, ისევ ჩვენი ქვეყნის ინტერესების დაცვის მიზნით, ბევრი რამის თქმა არ შეიძლება, არ ვიტყვი, მაგრამ კარგად იცით, რომ თქვენ ძალიან დიდი შეცდომები კი არა, ღალატი ჩაიდინეთ. ტერიტორიების გარდა, ასზე მეტი ახალი სოფელი ჩააბარეთ. პასუხი გაგვცენ, კოდორის ხეობა რატომ დაკარგეს ამ ადამიანებმა, რატომ ჩააბარეს. წარმოიდგინეთ, მათთვის არაფერს წარმოადგენს ჩვენი ტერიტორიების დაკარგვა. რა შეიძლება, უნდა იყოს ამაზე დიდი უბედურება, ტრაგედია, ოპოზიციონერი კი არა, პოლიტიკოსად წოდებული ვიღაც არარაობები გვეუბნებიან, რომ ეს თემა დავამთავროთო. მოგიწოდებთ, პატივცემულო განადგურებულო ოპოზიციავ, შეინარჩუნოთ კონსტრუქციულობა“, – განაცხადა ირაკლი ღარიბაშვილმა.