პრეზიდენტმა მედიასთან შეხვედრაზე ნიკა გვარამიას შეწყალების თემა კიდევ ერთხელ განმარტა და ხაზი გაუსვა, რომ ეს გადაწყვეტილება, მხოლოდ ქვეყნის ინტერესებიდან გამომდინარე მიიღო. „იმედის“ შეკითხვის პასუხად სალომე ზურაბიშვილმა ისიც დააკონკრეტა, რომ არავის წინაშე ვალდებული არ არის და რომ ნებისმიერ შეწყალებაზე გადაწყვეტილების მიღება მტკივნეული და რთულია.
„არავის წინაშე არ ვარ ანგარიშვალდებული და ეს გაიგო თავის დროზე სააკაშვილმა, ახლა – დღევანდელმა მთავრობამ. მე ვერ ვნახე, რომ ამან გამოიწვია დიდი ვნებათაღელვა. ეს არის ის გადაწყვეტილება, რომელიც ჩვენი ქვეყნის ინტერესებშია. მე ასე მიმაჩნია და ამიტომ მივიღე ეს გადაწყვეტილება. არ მივიღე იმიტომ, რომ მსიამოვნებდა, არ მივიღე, იმიტომ, რომ ეს ჩემთვის ძნელი გადაწყვეტილება არ იყო. ისიც მინდა, გითხრათ, რომ ყველა გადაწყვეტილება შეწყალებაზე არის რთული, ძალიან მტკივნეული და არ არის საჭირო, ვიღაცებმა ყოველდღიურად გამომიგზავნონ ნიკა გვარამიას ნათქვამები ჩემზე. კარგად მახსოვს“, – აღნიშნა სალომე ზურაბიშვილმა.
22 ივნისს, საქართველოს პრეზიდენტმა, სალომე ზურაბიშვილმა ტელეკომპანია „მთავარის“ გენერალური დირექტორი, ნიკა გვარამია შეიწყალა.