განათლების სამინისტრომ აქტიურად დაიწყო მუშაობა სასწავლო გეგმის გადახედვისა და გაუმჯობესების კუთხით, რომ მკვეთრად და კარგად იყოს გამოტანილი ისეთი მიმართულებები, როგორიც არის საქართველოს ისტორია, საეკლესიო ისტორია, სადაც არის პატრიოტული სულისკვეთება და გმირებზე გადმოცემული ამბები, – ამის შესახებ კოჯორში, გიორგი ანწუხელიძის სახელობის სერჟანტთა აკადემიაში თავდაცვის სამინისტროს ახალი პროექტის – „ჯარის ბანაკის“ გახსნის ღონისძიებაზე განათლებისა და მეცნიერების მინისტრმა, გიორგი ამილახვარმა განაცხადა.
„მადლობა მინდა გადავუხადო თავდაცვის სამინისტროს ამ პროექტისა და თანამშრომლობისთვის. ბუნებრივია, ეს ჩვენთვის არის ერთ-ერთი მნიშვნელოვანი მიმართულება. ორი სიტყვით მინდა შევეხო იმ უმნიშვნელოვანეს საკითხს, რომელიც პრემიერ-მინისტრის დავალებას წარმოადგენს. განათლების სამინისტრომ აქტიურად დაიწყო მუშაობა სასწავლო გეგმის გადახედვისა და გაუმჯობესების კუთხით, რომ მკვეთრად და კარგად იყოს გამოტანილი ისეთი მიმართულებები, როგორიც არის საქართველოს ისტორია, საეკლესიო ისტორია, სადაც არის პატრიოტული სულისკვეთება და გმირებზე გადმოცემული ამბები. მიგვაჩნია, რომ ეს არის ერთ-ერთი მნიშვნელოვანი საწყისი და საფუძველი, იმ სხვა საგნებთან ერთად, რომელიც საბოლოო ჯამში გვაყალიბებს იმ სულისკვეთების პატრიოტებად, როგორიც ყველას გვინდა, რომ გვყავდეს ჩვენი შვილები. დარწმუნებული ვარ, რომ ვინც ამ პროგრამაშია ჩართული, ყველა მიიღებს შესაბამის სულისკვეთებას. აქტიურად ვმუშაობთ სხვა პროგრამებზე, როგორც თავდაცვის სამინისტროსთან, ასევე სხვა უწყებებთან ერთად, რომ კიდევ უფრო მეტი ასეთი სახის პროექტი შევთავაზოთ სტუდენტებს და ახალგაზრდებს“, – აღნიშნა გიორგი ამილახვარმა.