„ქართული ოცნების“ თავმჯდომარე, საპარლამენტო უმრავლესობის ლიდერი ირაკლი კობახიძე რუსეთში, გენერალ პრიგოჟინის ამბოხიზე ქართული ოპოზიციის რეაქციებს გამოეხმაურა.
კობახიძე თვლის, რომ იმ დღეს ქართული ოპოზიცია ძალიან ამჩატდა და დადებითად მიიჩნევს იმ ფაქტს, რომ ისინი ამ დროს ხელისუფლებაში არ იყვნენ.
„რაც შეეხება ოპოზიციის სპეკულაციებს ჩვენთან მიმართებაში, იმ დღეს პირადად დილიდან მე მმართველი პარტიის თავმჯდომარემ მივეცი კომენტარი ამ საკითხთან დაკავშირებით, ყველას მოვუწოდე სიმშვიდისკენ. ჩვენ გავაკეთეთ გენერალური განცხადება და ძალიან მარტივი რჩევა მივეცით ყველას, რომ უნდა შეენარჩუნებინათ სიმშვიდე, არ დაგვიჯერეს. გახსოვთ შეძახილები „გოუ, გოუ ჟენია“, ეს ხომ „ნაცმოძრაობას“ ეკუთვნოდა, ლექსები მიუძღვნეს პრიგოჟინს. „სოჩა საქართველოა“, სოჩას სპეციალურად ვამბობ, ტრიალებდა „ნაცმოძრაობის“ „ფეისბუქ ბაბლში“. ეს იყო მათი რეაქცია პრიგოჟინის ამბოხთან დაკავშირებით. ზოგადად, პრიგოჟინის აჯანყებაზე რომ აგებ საკუთარ გეგმებს, მასში რომ ხედავ საკუთარ პოლიტიკურ შანსს, ეს უკვე თავისთავად მეტყველებს „ნაცმოძრაობის“ ბუნებაზე. ვერც გაანალიზეს, ვერც შეაფასეს, არ ეყოთ ამის უნარი, ამჩატდნენ და ამის შედეგი იყო ის უამრავი შეცდომა, რაც დაუშვეს განცხადებების კეთების დროს. რომ ჩავყვეთ რა ხდებოდა „გირჩის“ „ფეისბუქზე, მათ ჰყავთ ცნობილი ინტელექტუალები, ერთმანეთზე დაბალი დონის ინტელექტის მქონე ხალხია. სამარცხვინო განცხადებები კეთდებოდა. ჯაფარიძის „გირჩს“ ვგულისხმობ. ნახეთ „ფეისბუქზე“ რა ხდებოდა, ინტელექტის ზეიმია და მეორე, როგორ არ უნდა ამჩატდეს პოლიტიკური პარტია, საუკეთესო ილუსტრაციას დაინახავთ. ხაზარაძის პოსტი გახსოვთ? ასეთი სისულელე როგორ უნდა დაწერო კაცმა. გახარიას განცხადება გახსოვთ იმ დღეს და ა.შ. ყველა ამჩატდა – გახარია, ხაზარაძე, „ნაცმოძრაობა“, „ლელო“, ეს არის სერიოზული პრობლემა. მადლობა ღმერთს, რომ ეს ადამიანები იმ დღეს არ იყვნენ ხელისუფლებაში და მადლობა ღმერთს, რომ ეს ადამიანები დღეს არ არიან ხელისუფლებაში“, – განაცხადა კობახიძემ.