პარლამენტის რეგლამენტში ფუნდამენტური ცვლილებები განხორციელდა, რომლის მიზანი იყო პარლამენტის საზედამხედველო ფუნქციების გაძლიერება, – ამის შესახებ „ქართული ოცნების“ თავმჯდომარე და საპარლამენტო უმრავლესობის ლიდერმა ირაკლი კობახიძემ პრესკონფერენციაზე განაცხადა.
„მაგალითად: ინტერპელაციის ნაწილში გვაქვს მნიშვნელოვანი ცვლილება, გაორმაგდა ინტერპელაციების რაოდენობა. თქვენ გახსოვთ, რომ წლების განმავლობაში, რომ არც პრემიერები და არც მინისტრები არ მოდიოდნენ პარლამენტში იმისთვის, რომ ანგარიშები წარმოედგინათ. დღევანდელი მოცემულობით, პრემიერ-მინისტრიც კი ვალდებულია ნებისმიერ სასესიო თვეში მობრძანდეს პარლამენტში და ანგარიში წარადგინოს. ახლა ყველაფერი არის ოპოზიციის ხელში, თუ ოპოზიცია თავისი კომპეტენციით შეძლებს საზედამხედველო ფუნქციის გამოყენებას, მისთვის გზა ხსნილია. მინისტრის საათთან დაკავშირებით იყო ასევე მნიშვნელოვანი ცვლილებები, რაც პარლამენტის რეგლამენტში განხორციელდა, მაგალითად, ანგარიშის წინასწარ წარდგენის ვალდებულება დაეკისრა მინისტრს. ერთ დღეში, ერთზე მეტი მინისტრის საათის გამართვა დაუშვებელია. საკომიტეტო მოსმენებთან დაკავშირებით გვაქვს ასევე მნიშვნელოვანი ცვლილებები; დაზუსტდა ვადები რაც დაკავშირებულია კომიტეტის თავმჯდომარის მიერ მინისტრის მოწვევასთან კომიტეტის სხდომაზე, ასევე დაადგინა ამ თემაზე პროაქტიული ანგარიშგების წესი. პარლამენტის წევრის კითხვა არის ერთ-ერთი მნიშვნელოვანი საზედამხედველო ინსტიტუტი სადაც ცვლილებები გვაქვს: კერძოდ: შემცირდა პასუხის გაცემის ვადები, ასევე აქაც პროაქტიულად გამოქვეყნდება ნებისმიერი ინფორმაცია, რაც დაკავშირებული იქნება შეკითხვების პასუხის გაცემასთან. თემატური მოკვლევის შემთხვევაში გვაქვს მნიშვნელოვანი ცვლილებები, კერძოდ დაწეულია კვორუმი, ასევე თემატური მოკვლევის რეკომენდაციების შესრულების კონტროლის მექანიზმი დაიხვეწა რეგლამენტში. სუსის უფრო ვალდებული არ იყო პირადად წარმოედგი და ანგარიში და ესეც დაზუსტდა – ის პირადად წარუდგენს ანგარიშს პარლამენტს სუს-ის საქმიანობაზე. როგორც ხედავთ, რეგლამენტის დონეზე ძალიან მნიშვნელოვანი ცვლილებები განხორციელდა, კანონმდებლობა საერთაშორისო სტანდარტებთან არის მთლიანად თავსებადი. პარლამენტს, მათ შორის ოპოზიციას სერიოზული ბერკეტები მიენიჭა, რომ განახორციელოს ეფექტიანი ზედამხედველობა“, – აღნიშნა კობახიძემ.