“როდესაც უკრაინის მხარეს შევახსენე, რომ საელჩოს არ დაუტოვებია კიევი იმ დროსაც კი, როდესაც ბევრმა სხვამ დატოვა დედაქალაქი, ამაზე კომენტარი არ გაკეთებულა”

როდესაც უკრაინის მხარეს შევახსენე, რომ საელჩოს არ დაუტოვებია კიევი იმ დროსაც კი, როდესაც ბევრმა სხვამ დატოვა დედაქალაქი, ამაზე კომენტარი არ გაკეთებულა, – ამის შესახებ საქართველოს ელჩმა უკრაინაში გიორგი ზაქარაშვილმა გადაცემაში „იმედი LIVE“ განაცხადა.

კითხვაზე, სააკაშვილის საქმის მიმართ იყო თუ არა ინტენსიური ინტერესი უკრაინის საგარეო საქმეთა სამინისტროს მხრიდან ბოლო პერიოდში, ზაქარაშვილმა აღნიშნა, რომ ასეთი რამ არ ყოფილა, რადგან უკრაინის მხარეს სრული ინფორმაცია ჰქონდა. ელჩის თქმით, რეალურად, შეხევდრებზე პერიოდულად ისმებოდა მათი მოქალაქის საკითხი, რაზეც ამომწურავი ინფორმაცია მიეწოდებოდა, როგორც მისი მდგომარეობის, ასევე იურიდიული სტატუსის შესახებ.

„იმაზე საუბარი, რომ ინფორმაცია ვინმეს არ ჰქონდა და რაიმე ახალი გაიგეს გასულ კვირას, ჩემი აზრით, სინამდვილეს არ შეესაბამება“, – დასძინა ელჩმა.

ამასთან, მან მადლობა გადაუხადა ქართული საელჩოს წარმომადგენლებს უკრაინაში, რომლებმაც უმძიმეს დღეებში არ დატოვეს უკრაინა და საელჩოს შენობიდან არ ჩამოხსნილა ქართული დროშა.

„როდესაც უკრაინის მხარეს შევახსენე, რომ საელჩოს არ დაუტოვებია კიევი იმ დროსაც კი, როდესაც ბევრმა სხვამ დატოვა დედაქალაქი, ამაზე კომენტარი არ გაკეთებულა. ის, რომ უკრაინის მხარის მიერ დამატებითი კომენტარი არ გაკეთდა და რეალურად ისევ გამეორდა პოზიცია – სააკაშვილის თემაა მთავარი და ჩემს განცხადებაზე კომენტარი აღარ გაკეთებულა, ჩემი აზრით, ეს აჩვენებს, რომ მათ დამატებითი არგუმენტები არ ჰქონდათ. კერძოდ, ეს ყველაფერი რომ ძირს უთხრის ქვეყნებს შორის ურთიერთობას, რომ არ არის სამართლიანი მეგობარი და სტრატეგიული ქვეყნის მიმართ“, – განაცხადა ზაქარაშვილმა.