გიორგი კახიანი – პროცედურებს ჩვენ თავიდან გავივლით და გაზაფხულზე ახალი მოსამართლეების არჩევა მოხდება

მოსამართლეების შერჩევის პროცედურებს ჩვენ თავიდან გავივლით და უკვე გაზაფხულზე მოხდება სტრასბურგში ახალი მოსამართლეების არჩევა, – ამის შესახებ საპარლამენტო უმრავლესობის წევრმა გიორგი კახიანმა ჟურნალისტებს განუცხადა.
როგორც კახიანმა აღნიშნა, ამ კანდიდატების შერჩევა თავიდანვე იმ კრიტერიუმების გათვალისწინებით მოხდა, რაც აუცილებლად უნდა ჰქონდეს მოსამართლეს.
„ზოგადად, ჩვენი პოზიცია ასეთი იყო, რომ სამივე კანდიდატი ამ კრიტერიუმებს აკმაყოფილებდა. ევროსაბჭოში ამ საკითხების განხილვა ხდება დახურულ რეჟიმში. ასეთი გადაწყვეტილებების მიღების შინაარსი კონფიდენციალურია და ხდება მხოლოდ ინფორმირება იმის თაობაზე, აირჩიეს თუ არა მოსამართლე. აქედან გამომდინარე, ვერ გეტყვით, რატომ არ მოხდა ჩვენი კანდიდატის არჩევა. რამდენადაც ვიცი, ამ საკითხის განხილვა გაზაფხულისთვის გადაიდო. შესაბამის პროცედურებს ჩვენ თავიდან გავივლით და უკვე გაზაფხულზე ახალი მოსამართლეების არჩევა მოხდება”, – განაცხადა გიორგი კახიანმა.