“გია ცერცვაძის საქმე იყო ერთადერთი ქეისი, რომელზეც ინტერპოლის მეშვეობით კონკრეტულ სისხლის სამართლის საქმეზე ინფორმაცია გაიცა”

ვადასტურებ, რომ გია ცერცვაძის საქმე იყო ერთადერთი ქეისი, რომელზეც ინტერპოლის მეშვეობით კონკრეტულ სისხლის სამართლის საქმეზე გაიცა ინფორმაცია, – ამის შესახებ შინაგან საქმეთა მინისტრის მოადგილემ შალვა ხუციშვილმა გია ცერცვაძის საქმის კომენტირებისას განაცხადა. კერძოდ, ჟურნალისტები დაინტერესდნენ მინისტრის მოადგილისგან უკრაინაში ქართველი მებრძოლების მიერ გაკეთებული განცხადებით, რომლის თანახმადაც ქართული მხარე რუსეთს აძლევს სამხედროების შესახებ ინფორმაციას.

როგორც შალვა ხუციშვილმა აღნიშნა, ამის შესახებ გავრცელებული ინფორმაცია არ შეესაბამება სიმართლეს. „ვადასტურებ, რომ გია ცერცვაძის საქმე არის ერთადერთი ქეისი, რომელზეც ინტერპოლის მეშვეობით არის გაცემული ინფორმაცია კონკრეტულ სისხლის სამართლის საქმეზე, ანუ სხვა მსგავსი ქეისი ჩვენ არ გვაქვს და არ არის საჭირო რაღაც შეთქმულების თეორიებზე საუბარი“, – განაცხადა ხუციშვილმა.