შსს მართვის მოწმობების ჩამორთმევაზე – სამმა მოქალაქემ ავტომანქანებით ჯგუფურად, უკანონოდ გადაკეტა რუსთაველის გამზირი

2016 წლის 10 დეკემბერს სამმა მოქალაქემ – საბა მ.-მ, მერაბ ს.-მ და ვახტანგ ხ.-მ თბილისში, ერთ-ერთი აქციის მსვლელობის დროს, ავტომანქანებით ჯგუფურად, უკანონოდ გადაკეტეს რუსთაველის გამზირი, მთლიანად დაიკავეს გზის სავალი ნაწილი, შეაფერხეს მოძრაობა და არ მისცეს სხვა მძღოლებს თავისუფლად გადაადგილების საშუალება, – ასე გამოეხმაურა შინაგან საქმეთა სამინისტრო სამი მძღოლისთვის მართვის მოწმობების ერთი წლით ჩამორთმევის საკითხს.
შსს-ში განმარტავენ, რომ ახსნა-განმარტებების ჩამორთმევის დროს სამივე მძღოლმა დაადასტურა მათ მიერ ჩადენილი სამართალდარღვევა, რის გამოც დაჯარიმდნენ მართვის მოწმობების ერთი წლის ვადით ჩამორთმევით.
„შსს-ს საპატრულო პოლიციის დეპარტამენტში აღნიშნულ ფაქტზე დაიწყო ადმინისტრაციული საქმისწარმოება, რა დროსაც ახსნა-განმარტებები ჩამოერთვათ საპატრულო პოლიციის იმ თანამშრომლებს, რომლებიც აქციის დროს ადგილზე წესრიგს იცავდნენ და სამივე მძღოლს, რომლებმაც დაადასტურეს მათ მიერ ჩადენილი სამართალდარღვევა.
ადმინისტრაციული საქმისწარმოების მასალები შემდგომი რეაგირებისთვის გადაიგზავნა სამართალდარღვევათა აღრიცხვისა და ანალიზის განყოფილებაში, დამრღვევ პირთა მიმართ ადმინისტრაციულ სამართალდარღვევათა კოდექსის 125-ე მუხლის 6-პრიმა ნაწილით გათვალისწინებული სახდელის დადების მიზნით, რაც სატრანსპორტო საშუალების მართვის მოწმობის 1 წლით შეჩერებას ითვალისწინებს“, – აღნიშნულია შსს-ს კომენტარში.
როგორც დღეს გამართულ ბრიფინგზე დაჯარიმებულმა ვახტანგ ხარაზიშვილმა განაცხადა, აქციზის ზრდის საწინააღმდეგო აქციაში მონაწილეობიდან 40 დღის შემდეგ საპატრულო პოლიციაში დაიბარეს და ახსნა-განმარტების დაწერა სთხოვეს. ვახტანგ ხარაზიშვილის თქმით, პოლიციას მისცა ჩვენება, რომლის თანახმადაც, მსვლელობის დროს, 15 კილომეტრი საათში სიჩქარით მოძრაობდა. მისი თქმით, მსვლელობაში მონაწილეობის გამო მას მართვის უფლება ერთი წლით აეკრძალა, რასაც შესაბამის უწყებებში ასაჩივრებს.
ტრანსპორტის საკითხებზე მომუშავე პლატფორმა „ჰაბ ჯორჯიას“ ხელმძღვანელის ვასილ ურუშაძის განცხადებით კი ბრალის დადება ორგანიზებული მსვლელობისთვის აბსურდია, რადგანაც ნებისმიერი ქართული ტრადიციული ქორწილი, დაკრძალვა ან საარჩევნოდ მაჟორიტარების ტრანსპორტით გადაადგილება მხარდამჭერებთან ერთად შეიძლება, ჩაითვალოს ორგანიზებულ მსვლელობად, რასაც არავინ აჯარიმებს.