“ოკუპირებული აფხაზეთის დე ფაქტო პრეზიდენტმა შედარებით დაარბილა უცხოური არასამთავრობო და საერთაშორისო ორგანიზაციების მუშაობის რეგულაციები და ამიერიდან იმ ორგანიზაციებს, რომლებიც აფხაზეთს ოკუპირებულ ტერიტორიად მიიჩნევენ, იქ მუშაობა არ აეკრძალებათ, როგორც ეს საწყის დოკუმენტში იყო განსაზღვრული. “უცხოური არასამთავრობო და საერთაშორისო ორგანიზაციების პროექტების განხორციელების გარკვეული ღონისძიებების შესახებ ცვლილებების” დოკუმენტის თანახმად, არასამთავრობო და საერთაშორისო ორგანიზაციებმა უნდა დააფიქსირონ აფხაზეთის ტერიტორიაზე რეგისტრირებული არაკომერციული ორგანიზაციების სახელწოდებები, რომლებიც თავიანთი პროგრამებისა და პროექტების განხორციელებაში ჩაერთვებიან. პროექტის განხორციელების ეტაპების გარდა, ახლა აუცილებელია მიუთითოთ თითოეული განხორციელებული ღონისძიება და მისი დაფინანსების ოდენობა”, – წერს გაზეთი “რეზონანსი” სტატიაში, სათაურით ბჟანიამ არასამთავრობოების რეგულირების დოკუმენტი მცირედ შეარბილა და ხელი მოაწერა – რას ითვალისწინებს აფხაზური ნორმა.
“ამასთან, ინფორმაცია არაკომერციული ორგანიზაციისა და საგადასახადო რეგისტრაციის შესახებ უნდა წარედგინოს აფხაზეთის საგარეო საქმეთა სამინისტროს; მხარეთა მიერ შეთანხმებული პროცედურა შესაბამისი ღონისძიების განხორციელებისათვის (მათ შორის ხელმოწერისათვის დაგეგმილი ხელშეკრულებების პროექტები) და დაფინანსების ოდენობა შესაბამისი პროგრამის განხორციელების ფარგლებში. მანამდე აფხაზეთის დე ფაქტო საგარეო საქმეთა მინისტრი იმუქრებოდა იმ საერთაშორისო ორგანიზაციებთან ურთიერთობის გაწყვეტით, რომლებმაც სეპარატისტული რესპუბლიკა ოკუპირებულ ტერიტორიად აღიარეს – ანუ, პრინციპში, ყველა მეტ-ნაკლებად ავტორიტეტულ ორგანიზაციასთან. როგორც “რეზონანსთან” ექსპერტები ამბობენ, თავად აფხაზეთშიც კი “ამ ავანტიურას” დიდი მხარდაჭერა არ ექნება. ამასთან, ფიქრობენ, რომ ეს საკითხი ერთგვარად დაკიდებულ მდგომარეობაშია და მანამ იქნება ასე, სანამ “უკრაინის საკითხს ფორმა არ მიეცემა”, – აღნიშნავს გამოცემა.
“ეხო კავკაზას” ინფორმაციით, 16 ნოემბერს აფხაზეთის თვითგამოცხადებული რესპუბლიკის საგარეო საქმეთა მინისტრმა ინალ არძინბამ სოხუმში მოქმედი საერთაშორისო არასამთავრობო ორგანიზაციების ხელმძღვანელებთან შეხვედრაზე განაცხადა, რომ შესაძლოა შეაჩეროს გაეროს სააგენტოს პროექტები, რომლებმაც უარი განაცხადეს შეხვედრაში მონაწილეობაზე. მისი თქმით, ეს აღიქმება, როგორც არაგამჭვირვალე საქმიანობის დადასტურება და ინფორმაციის დამალვის მცდელობა. კონფლიქტოლოგი პაატა ზაქარეიშვილი “რეზონანსთან” ამბობს, რომ სოხუმის რეჟიმის ეს დოკუმენტი “უცხოური აგენტების” შესახებ ქართული კანონის ანალოგიურია”, – დასძენს გამოცემა.
“რუსეთმა აფხაზეთშიც ვერ მოახერხა გაეტანა ის კანონი, რაც საქართველოში ჩაუვარდა – კანონი “უცხოეური აგენტების” შესახებ. ჩაუვარდა თბილისში და ჩაუვარდა სოხუმშიც. რუსეთი შემოვლითი გზებით ცდილობს რომ როგორმე გააკონტროლოს აფხაზეთის ტერიტორიაზე მოქმედი არასამთავრობო ორგანიზაციები, ამიტომ შემოიღეს მკაცრი რეგისტრაციის რეჟიმი, როცა ყოველი ღონისძიება, ყოველი შეხვედრა, ყოველი კონფერენცია უნდა იყოს შეთანხმებული. ასევე მკაცრდება კონტროლი დონორებსა და პარტნიორ ორგანიზაციებზეც, მკაცრდება რეგისტრაცია, ყოველ სამ თვეში ერთხელ ტარდება თუ არა ღონისძიებები, მაინც უნდა მოხდეს ამის დაფიქსირება. მუდმივი კონტროლის ქვეშ აჰყავთ არასამთავრობო ორგანიზაციები. რა შედეგებს მოიტანს? ეს იქნება უფრო მეტი შეზღუდვა და უფრო მეტი ბიუროკრატია. იმის იმედი აქვთ, რომ რუსები დაქანცავენ დონორებს ანგარიშვალდებულებებით, უფრო მეტი ფორმალურობა იქნება, და ამ ფონზე ნაკლებად აქტიური იქნება სამოქალაქო სექტორი”, – აცხადებს გამოცემის კორესპონდენტთან საუბრისას პაატა ზაქარეიშვილი.