სუს-მა ოზურგეთის საკრებულოს თავმჯდომარის დაკავება დაადასტურა. საგანგებო ბრიფინგი რამდენიმე წუთის წინ გაიმართა. ლაპარაკია 50 000 ლარზე. ამ წუთებში ოზურგეთის საკრებულოს შენობაში სახელმწიფო უსაფრთხოების სამსახურის წარმომადგენლები არიან შესული და ჩხრეკას აწარმოებენ. როგორც ცნობილი ხდება, სამართალდამცველები მერიის ოთახებს ჩხრეკენ.
დანაშაულში, სავარაუდოდ მერიის წარმომადგენლებიც მონაწილეობენ. საკრებულოში ამ ინფორმაციას არ ფლობენ და მხოლოდ იმას ამბობენ, რომ გელა კობალაძე თბილისში იმყოფებოდა.
ოპოზიცია საგამოძიებო უწყებების მერიაში შესვლას ქალაქის საკრებულოს თავმჯდომარის დაკავებას უკავშირებს. „სამი წლის განმავლობაში ტენდერებთან დაკავშირებით ძალიან ბევრი გახმაურებული თემა მქონდა. სხვადასხვა უწყებებსაც მივმართე, თუმცა არანაირი რეაგირება არ ყოფილა. ქალაქს თუ გადავხედავთ ძალიან ბევრი შეუსრულებელი და მიტოვებული სამუშაოებია. რის გამო დააკავეს, არ ვიცი“, – განაცხადა “გაერთიანებული დემოკრატიული მოძრაობიდან” საკრებულოს წევრმა თამარ ნადირაძემ.