უკრაინაში ფართომასშტაბიანი ომის დაწყებიდან, უკრაინიდან უკანონოდ გასვლის მცდელობისას, 30-მდე უკრაინელი მამაკაცი დაიღუპა. ამის შესახებ ინფორმაციას უკრაინის სახელმწიფო სასაზღვრო სამსახური ავრცელებს.
„ზოგიერთი დაიღუპა მთის მდინარის გადალახვის ან მთების გადასვლის მცდელობისას. საერთო ჯამში, სრულმასშტაბიანი ინტერვენციის დაწყებიდან, 30-მდე ადამიანი დაიღუპა საზღვრის უკანონოდ გადაკვეთის მცდელობისას“, – განაცხადა სასაზღვრო სამსახურის პრესსპიკერმა, ანდრი დემჩენკომ.
მათივე ცნობით, 24 მამაკაცი უკრაინა-რუმინეთის საზღვარზე, მდინარე ტისას გადაკვეთისას დაიღუპა.
გამონაკლისის გარდა, 18-დან 60 წლამდე ასაკის უკრაინის მოქალაქე მამაკაცებს საომარი მდგომარეობის გამო ქვეყნის დატოვება ეკრძალებათ. დემჩენკოს ცნობით, ომის დაწყებიდან სასაზღვრო სამსახურმა გამოავლინა 450-მდე დანაშაულებრივი ჯგუფი, რომლებიც ადამიანებს საზღვრის უკანონო გადაკვეთაში ეხმარებოდნენ. მანამდე, აპრილში დემჩენკომ უკრაინის საზოგადოებრივ მაუწყებელს განუცხადა, რომ უკრაინის ტერიტორიის უკანონოდ დატოვების მცდელობისას, ყოველდღიურად ათამდე მამაკაცს აჩერებენ.