“უკონტაქტო პატრულის მიერ პირადი ცხოვრების ამსახველი ინფორმაციის მოპოვების არავითარი საფრთხე არ არსებობს”

“პირად ცხოვრებას უკონტაქტო პატრული ვერანაირად ვერ ჩაიწერს, რადგან გადაღება ხდება საჯარო სივრცეში და ყველა მოქალაქე, რომელიც ამ საჯარო სივრცეში შედის, გაფრთხილებულია ჩაწერასთან დაკავშირებით”, – ამის შესახებ შს მინისტრის მოადგილემ, შალვა ხუციშვილმა განაცხადა.
მისი თქმით, უკონტაქტო პატრულის მიერ გადაღებული ვიდეომასალა 24 საათის განმავლობაში შეინახება, რის შემდეგაც ის განადგურებას დაექვემდებარება.
”ჩვენ პარლამენტში შევთანხმდით ყველა იმ მნიშვნელოვან გარემოებაზე და პირობაზე, რომელიც დააზღვევს უკონტაქტო პატრულს, რათა ის ბოროტად არ იყოს გამოყენებული. მასალების შენახვის ვადა არის 24 საათი, რის შემდეგაც ის უნდა განადგურდეს. პირად ცხოვრებას უკონტაქტო პატრული ვერანაირად ვერ ჩაიწერს, რადგან გადაღება ხდება საჯარო სივრცეში და ყველა მოქალაქე, რომელიც ამ საჯარო სივრცეში შედის, გაფრთხილებულია ჩაწერასთან დაკავშირებით. შესაბამისი გამაფრთხილებელი ნიშნები იქნება განთავსებული და ყველას ექნება მოლოდინი, რომ იქ მიმდინარეობს ვიდეოგადაღება. წინ არის პირველი და მეორე მოსმენები პარლამენტში, წინ გვაქვს ღია დისკუსიები და საზოგადოება დაინახავს, რომ პირადი ცხოვრების ამსახველი ინფორმაციის მოპოვების არავითარი საფრთხე არ არსებობს”, – განაცხადა შალვა ხუციშვილმა.