პენტაგონში აცხადებენ, რომ ტანკერზე, რომელიც გასულ კვირას იემენელი ჰუსიტების თავდასხმის ობიექტი გახდა, ამ დრომდე ხანძარია და წითელ ზღვაში შესაძლოა ნავთობი ჟონავს.
მათივე ცნობით, ბერძნული MV Sounion-ის გადარჩენის მცდელობებს ჰუსიტები აფერხებენ, რომლებიც გემთან მიახლოების შემთხვევაში მორიგი თავდასხმებით იმუქრებიან.
პირველი დარტყმა Sounion-ზე ჰუსიტებმა გასულ ოთხშაბათს განახორციელეს. ხომალდზე ხანძარი გაჩნდა და ის ძრავის გარეშე დარჩა. ევროპულმა სამხედრო ხომალდმა ეკიპაჟის 25 წევრის გადარჩენა შეძლო – ისინი ჯიბუტიში გადაიყვანეს. მოგვიანებით ჰუსიტები ხომალდს ისევ დაესხნენ თავს – მათ გამოაქვეყნეს ვიდეო, რომელშიც ჩანს, რომ გემს ცეცხლი წაუკიდეს.
BBC-ს ცნობით, ტანკერს 150 000 ტონა ნავთობი გადაჰქონდა. ამ რაოდენობის ნავთობის წყალში მოხვედრით შესაძლოა ეს აღმოჩნდეს ყველაზე მსხვილი ასეთი კატასტროფა ისტორიაში.
ჰუსიტები წითელ ზღვაში გემებს თავს უკვე 10 თვეა ესხმიან. მათი თქმით, ეს ისრაელსა და „ჰამასს“ შორის ომში პალესტინელების მხარდასაჭერად კეთდება.