გაერთიანებული სამეფოს ეკონომიკა ივლისში კვლავ სტაგნაციაში აღმოჩნდა. ოფიციალური მონაცემებით დასტურდება, რომ ამან დარტყმა მიაყენა ახალ ლეიბორისტულ მთავრობას, რომელიც ეკონომიკური ზრდას წინა პლანზე აყენებს. სტატისტიკის ეროვნული სამსახურის (ONS) განცხადებაში ნათქვამია, რომ მთლიანი შიდა პროდუქტი, ივნისთან შედარებით, საერთოდ არ გაზრდილა, ხოლო წარმოების დონე შემცირდა კიდეც. არადა, ანალიტიკოსები ივლისში ზრდის ტემპების უმნიშვნელო მატებას ვარაუდობდნენ იმ ფონზე, როდესაც დიდი ბრიტანეთის ეკონომიკა მეორე კვარტალში, პირველთან შედარებით, ოდნავ გაიზარდა. პრემიერ-მინისტრ კეირ სტარმერის ლეიბორისტული მთავრობა ხელისუფლებაში ივლისის დასაწყისში მოვიდა, რითაც დიდ ბრიტანეთში კონსერვატორების 14-წლიანი მმართველობა დასრულდა.
„ჩვენს წინაშე არსებული ამოცანის მასშტაბებიდან გამომდინარე, ილუზიებით არ ვიკვებები და ბრიტანელ ხალხთან გულწრფელი ვიქნები: ცვლილებები ერთ ღამეში არ მოხდება“, – განაცხადა ფინანსთა მინისტრმა, რეიჩელ რივზმა, ოთხშაბათს გამოქვეყნებული სტატისტიკური მონაცემების საპასუხოდ. „პოზიტიური ეკონომიკური ზრდის ორი კვარტალი 14-წლიან სტაგნაციას ვერ გადაწონის. ამიტომ ვიღებთ გრძელვადიან გადაწყვეტილებებს ჩვენი ეკონომიკის საფუძვლების გამოსასწორებლად“, – დასძინა მან. რივზმა პირობა დადო, რომ დააწესებს „რკინის დისციპლინას“ საჯარო ფინანსებზე, რათა აღმოფხვრას, მისი თქმით, 22-მილიარდფუნტიანი (29 მილიარდი დოლარი) შავი ხვრელი, რომელიც წინა კონსერვატიული მთავრობისგან მიიღო მემკვიდრეობით.
ფინანსთა მინისტრის თქმით, მისი პირველი ბიუჯეტი, რომლის მიღებაც ოქტომბრის ბოლოს მოხდება, გარკვეული გადასახადების გაზრდას ითვალისწინებს, დეფიციტის შესამცირებლად. მილიონობით პენსიონერისთვის საწვავზე შეღავათების შეწყვეტის შესახებ გადაწყვეტილება მთავრობამ უკვე გაასაჯაროვა.
„ამაზონის“ გამარჯვება
ტექნოლოგიური გიგანტი „ამაზონი“, მომდევნო ხუთი წლის განმავლობაში, დიდ ბრიტანეთში 8 მილიარდი ფუნტი სტერლინგს (10,5 მილიარდი დოლარი) ოდენობის ინვესტირებას განახორციელებს, რაც მისი ვებ-სერვისების ფილიალების შექმნის გზით, ათასობით სამუშაო ადგილს შექმნის. „ჩვენ ვიღებთ გრძელვადიან გადაწყვეტილებებს ჩვენი ეკონომიკის საფუძვლების გამოსასწორებლად, მათ შორის „ამაზონის“ ვებ-სერვისების ჩათვლით, რაც გაერთიანებული სამეფოს ეკონომიკის აღდგენას და ქვეყნის ყველა მხარეში მდგომარეობის გაუმჯობესებას შეუწყობს ხელს“, – დასძინა რივზმა. თავად „ამაზონი“ აცხადებს, რომ მისმა ინვესტიციებმა, რომელიც მონაცემთა ცენტრების მშენებლობაში, მათ ექსპლუატაციასა და მომსახურებაში ჩაიდება, დიდი ბრიტანეთის მშპ შეიძლება 14 მილიარდი ფუნტით გაზარდოს და წელიწადში 14000-ზე მეტ სამუშაო ადგილის შექმნას შეუწყოს ხელი. „ბრიტანეთის მთავრობა ცდილობს დაარწმუნოს „ამაზონი“ და მისი მსგავი სხვა მოთამაშეები, რომ განაგრძონ ინვესტიციების ჩადება ტექნოლოგიურ სერვისებში. ეს ჭკვიანური სტრატეგიაა“, – ამბობს AJ Bell-ის ფინანსური ანალიზის განყოფილების ხელმძღვანელ, დენი ჰიუსონი.
„მაგრამ იმის გათვალისწინებით, რომ ბევრი ჭორი დადის მომავალი წლის ბიუჯეტზე, გონიერი თავია საჭირო იმისათვის, რომ დიდ ბრიტანეთში ფულის შემოტანაში რაც შეიძლება მეტი ბიზნესი ჩაერთოს“.