ისრაელის მთავრობა „ჰამასს“ ცეცხლის შეწყვეტისა და მძევლების გათავისუფლების შესახებ შეთანხმების დარღვევაში ადანაშაულებს.
ისრაელის მთავრობის მიერ გავრცელებული ინფორმაციით, „ჰამასმა“ უკან დაიხია ზოგიერთი შეთანხმებიდან და ქმნის ბოლო წუთის კრიზისს მძევლების გათავისუფლების შეთანხმების დასრულებაში.
„ისრაელის კაბინეტი არ შეიკრიბება ვიდრე შუამავლები არ შეატყობინებენ ისრაელს, რომ „ჰამასმა“ მიიღო შეთანხმების ყველა ელემენტი“, – აღნიშნულია განცხადებაში.
გუშინ ღამით კატარის მთავრობამ, ისევე როგორც აშშ-ის პრეზიდენტმა, ჯო ბაიდენმა და აშშ-ის არჩეულმა პრეზიდენტმა, დონალდ ტრამპმა განაცხადეს, რომ შეთანხმება მიღწეულია, მაგრამ ისრაელის პრემიერ-მინისტრი ბენიამინ ნეთანიაჰუ ამტკიცებს, რომ საბოლოო შეთანხმება არ არის დადებული და დარჩენილია რამდენიმე მნიშვნელოვანი დეტალი.
ცნობისთვის, ისრაელის მედიამ აშშ-ის და არაბ ოფიციალურ პირებზე დაყრდნობით გაავრცელა ინფორმაცია, რომ ისრაელმა და „ჰამასმა“ ცეცხლის შეწყვეტისა და მძევლების გათავისუფლების შესახებ შეთანხმებას მიაღწიეს.