საქართველოს კულტურის მინისტრი თინათინ რუხაძე დაესწრო მეცნიერ ქალთა და გოგონათა საერთაშორისო დღისადმი მიძღვნილ ღონისძიებას, რომელიც საქართველოს განათლების, მეცნიერებისა და ახალგაზრდობის სამინისტროს ორგანიზებით გაიმართა.
სიტყვით გამოსვლისას თინათინ რუხაძემ დამსწრე საზოგადოებას მეცნიერ ქალთა და გოგონათა საერთაშორისო დღე მიულოცა და ყურადღება გაამახვილა სამეცნიერო სფეროებში მოღვაწე ქალების, მათ შორის – ახალგაზრდა მკვლევრების მხარდაჭერასა და მათი შესაძლებლობების განვითარების ხელშეწყობაზე.
ღონისძიებაზე საქართველოს განათლების, მეცნიერებისა და ახალგაზრდობის მინისტრმა ალექსანდრე წულაძემ ათი წარმატებული მეცნიერი ქალი დააჯილდოვა.
მეცნიერებს საპატიო ჯილდოები გადასცა ასევე საქართველოს შოთა რუსთაველის ეროვნული სამეცნიერო ფონდის გენერალურმა დირექტორმა თეიმურაზ დოჭვირმა.
დამსწრე საზოგადოებას სიტყვით მიმართეს საქართველოს პარლამენტის ვიცე-სპიკერმა ნინო წილოსანმა და საქართველოს მეცნიერებათა ეროვნული აკადემიის პრეზიდენტმა როინ მეტრეველმა.
11 თებერვალს მეცნიერ ქალთა და გოგონათა საერთაშორისო დღე, გაეროს გენერალური ასამბლეის რეზოლუციის თანახმად, 2015 წლიდან აღინიშნება. მისი მიზანია მეცნიერებით დაინტერესებულ ქალთა და გოგონათა ხელშეწყობა, მეცნიერების, ინოვაციებისა და ტექნოლოგიების სისტემაში მათი მზარდი როლის მხარდაჭერა.