საქართველოში 19-21 თებერვალს მოსალოდნელია ნალექი, უმეტესად თოვლის სახით, ზოგან – ძლიერი, მთაში და მაღალმთაში – ზოგან ნისლი, ქარბუქი და ზვავსაშიშროება.
ამის შესახებ ინფორმაციას გარემოს ეროვნული სააგენტო ავრცელებს.
სინოპტიკოსების პროგნოზით, საავტომობილო გზებზე – ლიპყინული, ელექტროგადამცემ ხაზებზე კი შემოყინულობაა მოსალოდნელი.
„დიდთოვლობის, ხილვადობის გაუარესების, ქარბუქის, ლიპყინულის და ზვავსაშიშროების გამო საავტომობილო გზების ცალკეულ მონაკვეთებზე, შესაძლებელია, შეიზღუდოს ტრანსპორტის მოძრაობა. საფრთხის დონე საშუალო“, – ნათქვამია ინფორმაციაში.
როგორც სინოპტიკოსმა, თამარ პაპაშვილმა განაცხადა, დღეიდან პოლარული ცივი ჰაერის მასების გავრცელება დაიწყო, რაც ამინდის მკვეთრ გაუარესებას გამოიწვევს – ნალექის, უმეტესად კი, თოვლის სახით.
„აღმოსავლეთ საქართველოში ჰაერის მაქსიმალური ტემპერატურა დღისით 0 გრადუსამდე იქნება, ზოგან კი ბევრად დაბალი, დასავლეთ საქართველოში 1-6 გრადუსი დაფიქსირდება. თბილისში დღეს ღრუბლიანი ამინდი შენარჩუნდება, დღის განმავლობაში შესაძლოა, გამოიდაროს, თუმცა საღამოს საათებში ისევ მოიღრუბლება და გამთენიისას გაწვიმდება. ხვალ დღის განმავლობაში მოსალოდნელია, როგორც წვიმა, ასევე თოვლჭყაპი, ხოლო 20 თებერვლიდან თბილისში, კახეთსა და შიდა ქართლში, განსაკუთრებულად ნალექი თოვლის სახით იქნება“, – განაცხადა თამარ პაპაშვილმა.
მისი თქმით, ზვავსაშიშროება ნარჩუნდება ჩრდილო მაღალმთიან რაიონებში, განსაკუთრებით გუდაური-კობის მონაკვეთზე.
„ზვავსაშიშროების დონე მაღალია, რთული მეტროლოგიური პირობები შეიქმნება ძირითადად უღელტეხილებზე, ეს ეხება არა მხოლოდ გუდაური-კობი- ლარსის მონაკვეთს, ასევე კახეთში არსებულ უღელტეხილებს, მაგალითად გომბორს, ასევე სამხრეთ საქართველოს, აჭარის ან რაჭა-ლეჩხუმის, ზემო-სვანეთის ტერიტორიებს, ყველგან უღელტეხილებზე შეიქმნება სახიფათო მდგომარეობა. რეკომენდაცია გაცემულია, ავტოტრანსპორტის მოძრაობა შეფერხდება, მაგრამ რამდენიმე დღე. საუბარია 20-დან 23 თებერვლის ჩათვლით. შემდეგ თოვლის ინტენსივობა შესუსტდება“, – განაცხადა თამარ პაპაშვილმა.