აშშ-ის პრეზიდენტმა, დონალდ ტრამპმა თავის სოციალურ ქსელში დაწერა, რომ კანადის პრემიერ-მინისტრთან, ჯასტინ ტრუდოსთან სატელეფონო საუბარი გამართა.
დონალდ ტრამპის ინფორმაციით, საუბარი ტარიფებს, ასევე, მიგრანტების საკითხს შეეხო. ტრამპის თქმით, მან ტრუდოს კითხვა არჩევნების ჩატარებაზეც დაუსვა, რაზეც პასუხი ვერ მიიღო.
„ჯასტინ ტრუდომ კანადიდან დამირეკა და მკითხა, რა მოვუხერხოთ ტარიფებს. მე მას ვუთხარი, რომ კანადიდან და მექსიკიდან შემოსული ფენტანილის გამო ბევრი ადამიანი დაიღუპა, და ვერაფერი დამარწმუნებს იმაში, რომ ეს შეჩერდა. მან მითხრა, რომ სიტუაცია უკეთესობისკენ შეიცვალა, მაგრამ მე ვუპასუხე: „ეს საკმარისი არ არის“. საუბარი მეტ-ნაკლებად მეგობრულად დასრულდა! მან ვერ მითხრა, თუ როდის გაიმართება კანადაში არჩევნები. დავინტერესდი, თუ რა ხდება მანდ. შემდეგ მივხვდი, რომ ის ამ საკითხს ხელისუფლებაში დასარჩენად იყენებს. წარმატებები, ჯასტინ!“, – დაწერა ტრამპმა.
ამის შემდეგ, თეთრი სახლის ლიდერმა კიდევ ერთი პოსტი გამოაქვეყნა, სადაც ჯასტინ ტრუდო კანადის გუბერნატორად მოიხსენია.
ცნობისთვის, აშშ-ის პრეზიდენტმა, დონალდ ტრამპმა განაცხადა, რომ 4 მარტს მისი ადმინისტრაცია მექსიკასა და კანადას ტარიფებს დაუწესებს. მან მექსიკა და კანადა აშშ-ში ნარკოტიკების შემოდინებაში დაადანაშაულა.