იტალიის პრემიერ-მინისტრმა, ჯორჯია მელონიმ ვაშინგტონში აშშ-ის პრეზიდენტთან, დონალდ ტრამპთან შეხვედრის შემდეგ განაცხადა, რომ მისი მიზანია გახადოს დასავლეთი კვლავ დიადი.
ამ მიზნით, როგორც მელონიმ შეხვედრის შემდეგ გამართულ პრესკონფერენციაზე განაცხადა, მან ტრამპი იტალიაში მიიწვია. მისი თქმით, ტრამპმა მიწვევა მიიღო და უახლოეს მომავალში რომში ოფიციალური ვიზიტით ჩავა.
მელონის თქმით, რომში ვიზიტისას ტრამპს ევროპის სხვა ლიდერებთან შეხვედრის შესაძლებლობა ექნება. „ჩემი მიზანია, გავხადო დასავლეთი კვლავ დიადი“, – დასძინა მელონიმ.
იტალიის პრემიერისა და თეთრის სახლის ლიდერის განცხადებით, ისინი აშშ-სა და ევროკავშირს შორის სატარიფო კონფლიქტის დასრულებას ოპტიმიზმით უყურებენ.
ცნობისთვის, ტრამპმა აპრილის დასაწყისში ევროკავშირს 25-პროცენტიანი ტარიფი დაუწესა ფოლადის, ალუმინის, ავტომობილებისა და მრავალი სხვა საქონლის იმპორტზე.