აშშ-ის პრეზიდენტის, დონალდ ტრამპის განცხადებით, უკრაინის პრეზიდენტი ვოლოდიმირ ზელენსკი უფრო დამშვიდებულია და უფრო მეტად დაინტერესებულია ომის დასრულების შესახებ შეთანხმების მიღწევით.
ტრამპის თქმით, ვატიკანში უკრაინის პრეზიდენტთან შესანიშნავი შეხვედრა ჰქონდა. აშშ-ის პრეზიდენტმა აღნიშნა, რომ ზელენსკისთან ცუდი ურთიერთობა არასდროს ჰქონია, ოვალურ კაბინეტში მათი დაპირისპირება კი მცირე დაბრკოლება იყო.
„ვხედავ, უფრო დამშვიდებულია. ვფიქრობ, სიტუაციას უკეთ აცნობიერებს და გარიგების დადება სურს. ვფიქრობ, რომ შეხვედრა კარგად წარიმართა. ვნახოთ, რა მოხდება მომდევნო დღეებში. სავარაუდოდ, ბევრ რამეს გავიგებთ“, – განაცხადა ტრამპმა.
აშშ-ის პრეზიდენტმა აღნიშნა, რომ შეხვედრაზე მოკლედ განიხილეს ყირიმის საკითხი. ჟურნალისტის კითხვაზე, ფიქრობს თუ არა, რომ პრეზიდენტი ზელენსკი მზადაა, ყირიმი დათმოს, ტრამპმა უპასუხა: „ვფიქრობ, კი“.
„ყირიმი 12 წლის წინ იყო. ეს იყო პრეზიდენტი ობამას დროს. მათ დათმეს ის ისე, რომ ერთი გასროლაც არ ყოფილა. ასე რომ, ნუ მელაპარაკებით ყირიმზე. ესაუბრეთ ობამას და ბაიდენს ყირიმზე. და გახსოვდეთ, ეს არის ბაიდენის ომი. ეს არ არის ტრამპის ომი. მე მოვედი პრობლემის გადასაჭრელად. და პრობლემა ის არის, რომ ამდენი ადამიანი კვდება“, – განაცხადა ტრამპმა.
ამასთან, დონალდ ტრამპმა აღნიშნა, რომ იმედგაცრუებულია რუსეთის მხრიდან უკრაინაზე თავდასხმების გაგრძელების გამო და მოუწოდა რუსეთის პრეზიდენტს, ვლადიმერ პუტინს, „შეწყვიტოს სროლა, დაჯდეს და ხელი მოაწეროს შეთანხმებას“.
აშშ-ის პრეზიდენტის თქმით, არ შეუძლია, დანამდვილებით თქვას, სერიოზულად ფიქრობს თუ არა რუსეთის ლიდერი ომის დასრულებაზე.