სავაჭრო ურთიერთობების გაღრმავება ერთ-ერთი საკითხი იყო, რომელზეც ვისაუბრეთ – როგორც უნგრეთს შეუძლია, იყოს საქართველოსთვის ფაქტობრივად, კარიბჭე ევროკავშირის ბაზართან მიმართებით და ერთობლივად შევძლოთ არა მხოლოდ უნგრეთის, არამედ ევროკავშირის ბაზარზე აქტიურად შესვლა, ზუსტად ასევეა შესაძლებელი, საქართველო გახდეს უნგრეთისთვის შესაძლებლობა, გამოიყენოს ის თავისუფალი ვაჭრობის ხელშეკრულებები, რომელიც საქართველოს აქვს, – განაცხადა გარემოს დაცვისა და სოფლის მეურნეობის მინისტრმა, დავით სონღულაშვილმა „დღის ქრონიკაში“ ჩართვისას.
მინისტრმა უნგრეთში ვიზიტი შეაჯამა და დაგეგმილ ახალ პროექტებზე ისაუბრა.
„მოგეხსენებათ, რომ საქართველოს აქვს თავისუფალი სავაჭრო ხელშეკრულებები გაფორმებული ისეთ ბაზრებთან, რომელიც ჯამში, 2,2 მლრდ-ის მოსახლეობას სწვდება. ზუსტად ამიტომ, ეს არის ძალიან კარგი შესაძლებლობა უნგრეთისთვისაც და აქედან გამომდინარე, ურთიერთთანამშრომლობა სავაჭრო მიმართულებით არის ორივე ქვეყნის ინტერესი და შესაძლებლობა. აქ არის უდიდესი პოტენციალი, როგორც საქართველოსთვის უნგრეთთან მიმართებაში, ასევე უნგრეთისთვის საქართველოსთან მიმართებით“, – განაცხადა მინისტრმა.
სონღულაშვილის თქმით, შეხვედრებზე საუბარი იყო ასევე სტუდენტების გაცვლით პროგრამებზე. კერძოდ, ქართველ სტუდენტებს მიეცემათ შესაძლებლობა, ისწავლონ უნგრეთის აგრარულ უნივერსიტეტში, რომელიც ევროპაში მნიშვნელოვანი სასწავლებელია.