ამერიკის შეერთებული შტატების პრეზიდენტმა, დონალდ ტრამპმა რუსეთის საგარეო საქმეთა მინისტრ სერგეი ლავროვთან შეხვედრაზე მკაცრად გასაიდუმლოებული სადაზვერვო ინფორმაცია გაამჟღავნა, რამაც საფრთხის ქვეშ დააყენა უმნიშვნელოვანესი წყარო, რომელიც დაზვერვას “ისლამური სახელმწიფოს” შესახებ ინფორმაციას აწვდიდა – წერს Washington Post-ი ამერიკის ყოფილ და მოქმედ მაღალჩინოსნებზე დაყრდნობით.
“ინფორმაცია, რომელიც პრეზიდენტმა გაამჟღავნა, მიწოდებული იყო აშშ-ს პარტნიორის მიერ, სადაზვერვო ინფორმაციის გაცვლის შეთანხმების ფარგლებში და იმდენად სენსიტიურად იყო მიჩნეული, რომ მისი დეტალები დაფარული იყო მოკავშირეებისთვის და მკაცრად შეზღუდული – მთავრობის შიგნითაც. პარტნიორს აშშ-ს დაზვერვისთვის ინფორმაციის რუსეთისთვის გაცნობის უფლება არ მიუცია. დონალდ ტრამპის ნაბიჯი საფრთხეს უქმნის მოკავშირესთან თანამშრომლობის პროცესს. მოკავშირეს წვდომა აქვს “ისლამური სახელმწიფოს” შიდა საქმიანობასთან”, – ნათქვამია ტექსტში.
შტატების პრეზიდენტმა რუსეთის საგარეო საქმეთა მინისტრს და ელჩს თეთრ სახლში გასულ კვირას უმასპინძლა. ეროვნული უსაფრთხოების მრჩევლის განცხადებით, შეხვედრაზე ტერორისტული ორგანიზაციების მხრიდან მომავალ ძირითად საფრთხეებზე ისაუბრეს და არანაირი სადაზვერვო ინფორმაცია არ განხილულა.
ცენტრალური დაზვერვის (CIA) და ეროვნული უსაფრთხოების (NSA) სააგენტოებს კომენტარი ჯერ არ გაუკეთებიათ.