რუსული РИА-ს ცნობით, თეთრი სახლი სიცრუეს უწოდებს გაზეთ Washington Post-ის სტატიას, რომელშიც ნათქვამია, რომ აშშ-ის პრეზიდენტმა დონალდ ტრამპმა რუსეთის საგარეო საქმეთა მინისტრს სერგეი ლავროვს საიდუმლო ინფორმაცია გადასცა.
„ინფორმაცია, რომელიც გავრცელდა, მცდარია“, – განცხადა ნაციონალური უსაფრთხოების საკითხებში აშშ-ის პრეზიდენტის მრჩეველმა ჰერბერტ მაკმასტერმა, რომელიც ტრამპის და ლავროვის შეხვედრას ესწრებოდა.
„პრეზიდენტმა და რუსეთის საგარეო საქმეთა მინისტრმა ტერორიზმის საერთო საფრთხეები განიხილეს, მათ შორის საავიაციო საფრთხეები. არ განხილულა დაზვერვის მეთოდები და წყაროები. შეხვედრაზე საუბარი არ ყოფილა იმ სამხედრო ოპერაციებზე, რომლის შესახებაც ოფიციალურად არ იყო ცნობილი“, – დასძინა მაკმასტერმა. ასეთივე განცხადება გააკეთა მაკმასტერის მოადგილე დინა პაუელმა.
აშშ-ის სახელმწიფო მდივნის, რექს ტილერსონის განცხადებით, შეხვედრაზე კონკრეტული საფრთხეები განიხილებოდა, თუმცა არა სამხედრო ოპერაციები და საიდუმლო მასალები. სახელმწიფო მდივნის განცხადებას CNN ავრცელებს.
ამერიკის შეერთებული შტატების პრეზიდენტმა, დონალდ ტრამპმა რუსეთის საგარეო საქმეთა მინისტრ სერგეი ლავროვთან შეხვედრაზე მკაცრად გასაიდუმლოებული სადაზვერვო ინფორმაცია გაამჟღავნა, რამაც საფრთხის ქვეშ დააყენა უმნიშვნელოვანესი წყარო, რომელიც დაზვერვას “ისლამური სახელმწიფოს” შესახებ ინფორმაციას აწვდიდა – წერს Washington Post-ი ამერიკის ყოფილ და მოქმედ მაღალჩინოსნებზე დაყრდნობით.
შტატების პრეზიდენტმა რუსეთის საგარეო საქმეთა მინისტრს და ელჩს თეთრ სახლში გასულ კვირას უმასპინძლა.