“ბექა ოდიშარიას მიმართ გამოყენებული სიძულვილის ენა ყოველგვარ ზღვარს სცილდება. ეს არც ქრისტიანულია, არც ადამიანურია. გუშინ კიდევ ერთხელ გამოჩნდა, რომ რადიკალური ოპოზიცია ემზადება კიდევ უფრო მეტი დაპირისპირებისთვის, იმისთვის, რომ საზოგადოებაში კიდევ უფრო მეტად იყოს დაძაბული ფონი,” – ამის შესახებ საპარლამენტო პოლიტიკური ჯგუფის “ევროპელი სოციალისტები” თავმჯდომარემ, ლადო ბოჟაძემ განაცხადა.
როგორც ბოჟაძემ აღნიშნა, საზოგადოება უნდა შეთანხმდეს, რომ პოლიტიკური ბრძოლის მეთოდები უნდა იყოს მხოლოდ მშვიდობიანი და კონსტიტუციურ ფარგლებში.
“როგორც ჩანს, ის სცენარი, რომელზეც ჩვენ ვსაუბრობდით, რომ 4 ოქტომბერი გამოყენებული იქნება ახალი დესტაბილიზაციისთვის, დამხობისთვის, ეს გეგმა არსებობს, თუმცა დარწმუნებული ვარ, რომ არც სახელმწიფო და არც ქართველი ხალხი ასეთ არეულობას ქვეყანაში არ დაუშვებს. საზოგადოება უნდა შეთანხმდეს, რომ პოლიტიკური ბრძოლის მეთოდები არის მშვიდობიანი, კანონიერი, კონსტიტუციურ ფარგლებში და, რაც ყველაზე მთავარია, სიძულვილის ენა და ასეთი სახის დაპირისპირებები ქართველებისთვის, ქრისტიანებისთვის სრულიად მიუღებელი,” – განაცხადა საპარლამენტო პოლიტიკური ჯგუფის “ევროპელი სოციალისტები” თავმჯდომარემ, ლადო ბოჟაძემ.
ამასთან, ბექა ოდიშარიასთან დაკავშირებით მომხდარ ინციდენტზე შეფასებები გაკეთდა ოპოზიციაში. “ერთიანობა – ნაციონალური მოძრაობის” გენერალური მდივნის მოადგილე, ირაკლი ფავლენიშვილის თქმით, “რა თქმა უნდა, არაეთიკური გახლავთ, რომ ადამიანს ჯანმრთელობაზე ასეთი რამ უთხრა.”
ლიბერალური ფაშიზმის და ძალადობის მორიგ ფაქტად აფასებს მმართველი გუნდი გუშინ ბექა ოდიშარიასთან დაკავშირებით მომხდარ ინციდენტს. “ქართული ოცნების” საკრებულოს წევრობის კანდიდატს მელიქიშვილის ქუჩაზე შეკრებილმა აქციის მონაწილეებმა ჯერ წყალი შეასხეს, შემდეგ კი მისი ჯანმრთელობის მდგომარეობას შეეხნენ. “მოკვდები ისედაც კიბო გაქვს” – უყვიროდნენ ოდიშარიას აქციის მონაწილეები. დაპირისპირება კახა კალაძის საარჩევნო შტაბის გახსნის ღონისძიების დასრულების შემდეგ მოხდა, როდესაც ოდიშარია ოფისს ტოვებდა.